Aitysker aqyn Ainur Tursynbaeva sózdiń qudireti men kiesi týraly pikir bildirdi. Ol adamnyń aýzynan shyqqan sóz keide óz taǵdyryna áser etýi múmkin ekenin aityp, óner adamdarynyń ómirinen mysal keltirdi, dep dalanews.kz tilshisi kznews.kz saityna silteme jasap habarlaidy.
Aqynnyń sózinshe, aitylǵan ár sózdiń salmaǵy bar. Sondyqtan adam, ásirese kópshilik aldynda júrgen tulǵalar, sóilegen sózine abai bolýy kerek. Ainur Tursynbaeva bul oiyn belgili óner ieleriniń taǵdyryndaǵy oqiǵalarmen bailanystyra túsindirdi.
"Sózdiń kiesi bar. Qyrshynynan qiylǵan Denis Tennen "sportta qai jasqa deiin júresiń?" dep suraǵanda, "25 jasqa deiin" dep jaýap bergen. Onyń 25 ke jetpei qaza tapqany esterińizde shyǵar...
Orazaly Dosbosynov degen alapat aqyn dosym kóbinese sózdi: "Atym Oraz bolǵanmen, Otyzdan jasym aspaǵan, Iegin saqal jappaǵan. Súiinbaimyn, Jambylmyn, Tańjyryqpyn, Sharǵynmyn", – dep bastaityn... Shynynda jasy otyzdan aspady, nebári 29 jasynda jaryq dúniemen qosh aitysyp kete berdi.
Keiin Oraldan Asylbek Isshanov degen aqyn bala shyqty. Sol bala óziniń eń sońǵy aitysynda: "Bir kúnde bes aqynmen, Aitysyp bárin jeńetin, Orazalynyń jolyn ber" dep jyrlaǵan eken. Arada kóp ýaqyt ótpei jap-jas Asylbek týra Orazaly aǵasy qusap jol apatynan qaza tapty.
Ataqty Jánibek Kármenovtyń keremet termesi bar, sol termeniń ishinde "Jalǵyz shyqpa saparǵa, ókinishte qalarsyń" degen joldar bar.. Sol Jánibek aǵamyzdyn jolǵa jalǵyz shyǵyp ketip júregi toqtap qalyp, jol apatyna ushyrap qaitys bolǵanyn bireý bilip, bireý bilmes...
Ataqty Muqaǵalidyń da: "Uiyqtap ketsem bolǵany tósegimde, Qyryqtyń beseýinde" degen óleńi bar.. Aqiyq aqyn shynynda 45 jasynda dúnieden ótken edi", – dep jazdy Ainur Tursynbaeva.
