Shymkent ákiminiń orynbasary Rýslan Berdenov sot otyrysyna qatysty málimdeme jasady, dep habarlaidy Dalanews.kz.
Sheneýniktiń aitýynsha, densaýlyǵyna jáne bes oq jaraqatynan keiin ońaltý kezeńinen ótip jatqanyna bailanysty sot otyrystaryna jeke qatysýyna múmkindik joq.
"Sot protsesin jáne oǵan qatysty aqparattyq keńistiktegi ahýaldy muqiiat baqylap otyrmyn. Sotta jaýapker Jienbai tarapynan aitylyp jatqan málimdemelerge únsiz qalý múmkin emes. Bul - tek qysym kórsetý áreketi. Sońǵy ret men ony sol kúni, dál ózi ańshy myltyǵynan atyp ketken keshte kórdim. Odan keiin bizde eshqandai bailanys bolǵan joq. Keiinirek ol ókilderimen birge meniń qorǵaýshylarymmen bailanys ornatýǵa tyrysyp, "dostasýdy" usyndy", - deidi ol.
Rýslan Berdenov ózine qandai qysym jasalǵanyn baiandady.
"Keshirim berilse, shý kótermeimiz dedi, al bas tartqan jaǵdaida "aqparattyq jarylys" jasaimyz dep ses kórsetti. Tipti aiyptalýshynyń ákesi ózin-ózi órteidi degen málimdeme jasalatynyn aitty. Muny men tikelei qysym dep baǵalaimyn. Men qandai da bir qysym men arandatýǵa jol bermedim", - dedi ol.
Ákimniń orynbasary bul oqiǵanyń túpki sebebi nede ekenin aitty.
"Bastapqy ustanymym ózgergen joq. Qaqtyǵystyń túp-tórkini kásibi, qyzmettik sipatta. Jaýapker kelisim aiasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemeler oryndalýyn talap ettim. Al qoǵam nazaryn "qyzǵanysh", "jeke qatynas", "jubaiy" sekildi jalǵan sebepterge burý - manipýliatsiia, shyndyqtan alystatý. Men onyń jubaiyn da, otbasyn da tanymaimyn. Ol men úshin tek merdiger bolatyn", - dedi Berdenov.
Rýslan Berdenov sottaǵy málimdemelermen kelispeitinin jetkizdi.
"Budan da soraqysy: búginde bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqiqatqa emes, qysym kórsetý men bedelge nuqsan keltirýge baǵyttalǵan óreskel manipýliatsiia ekenin dáleldeidi. Men mundai málimdemelerdi úzildi-kesildi joqqa shyǵaramyn jáne olardy moiyndamaimyn", - dedi ol.
Sheneýnik denesinde áli de qorǵasyn oqtary baryn aitty.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
