شىمكەنت اكىمىنىڭ ورىنباسارى رۋسلان بەردەنوۆ سوت وتىرىسىنا قاتىستى مالىمدەمە جاسادى، دەپ حابارلايدى Dalanews.kz.

شەنەۋنىكتىڭ ايتۋىنشا، دەنساۋلىعىنا جانە بەس وق جاراقاتىنان كەيىن وڭالتۋ كەزەڭىنەن ءوتىپ جاتقانىنا بايلانىستى سوت وتىرىستارىنا جەكە قاتىسۋىنا مۇمكىندىك جوق.

"سوت پروسەسىن جانە وعان قاتىستى اقپاراتتىق كەڭىستىكتەگى احۋالدى مۇقيات باقىلاپ وتىرمىن. سوتتا جاۋاپكەر جيەنباي تاراپىنان ايتىلىپ جاتقان مالىمدەمەلەرگە ءۇنسىز قالۋ مۇمكىن ەمەس. بۇل - تەك قىسىم كورسەتۋ ارەكەتى. سوڭعى رەت مەن ونى سول كۇنى، ءدال ءوزى اڭشى مىلتىعىنان اتىپ كەتكەن كەشتە كوردىم. ودان كەيىن بىزدە ەشقانداي بايلانىس بولعان جوق. كەيىنىرەك ول وكىلدەرىمەن بىرگە مەنىڭ قورعاۋشىلارىممەن بايلانىس ورناتۋعا تىرىسىپ، "دوستاسۋدى" ۇسىندى"، - دەيدى ول.

رۋسلان بەردەنوۆ وزىنە قانداي قىسىم جاسالعانىن باياندادى.

"كەشىرىم بەرىلسە، شۋ كوتەرمەيمىز دەدى، ال باس تارتقان جاعدايدا "اقپاراتتىق جارىلىس" جاسايمىز دەپ سەس كورسەتتى. ءتىپتى ايىپتالۋشىنىڭ اكەسى ءوزىن-وزى ورتەيدى دەگەن مالىمدەمە جاسالاتىنىن ايتتى. مۇنى مەن تىكەلەي قىسىم دەپ باعالايمىن. مەن قانداي دا ءبىر قىسىم مەن ارانداتۋعا جول بەرمەدىم"، - دەدى ول.

اكىمنىڭ ورىنباسارى بۇل وقيعانىڭ تۇپكى سەبەبى نەدە ەكەنىن ايتتى.

"باستاپقى ۇستانىمىم وزگەرگەن جوق. قاقتىعىستىڭ تۇپ-توركىنى كاسىبي، قىزمەتتىك سيپاتتا. جاۋاپكەر كەلىسىم اياسىنداعى جۇمىسىن ادال اتقارعىسى كەلمەدى، ەسەپ بەرۋدەن جالتاردى. مەن تەك اشىقتىق پەن مىندەتتەمەلەر ورىندالۋىن تالاپ ەتتىم. ال قوعام نازارىن "قىزعانىش"، "جەكە قاتىناس"، "جۇبايى" سەكىلدى جالعان سەبەپتەرگە بۇرۋ - مانيپۋلياسيا، شىندىقتان الىستاتۋ. مەن ونىڭ جۇبايىن دا، وتباسىن دا تانىمايمىن. ول مەن ءۇشىن تەك مەردىگەر بولاتىن"، - دەدى بەردەنوۆ.

رۋسلان بەردەنوۆ سوتتاعى مالىمدەمەلەرمەن كەلىسپەيتىنىن جەتكىزدى.

"بۇدان دا سوراقىسى: بۇگىندە بۇل جالعان مالىمدەمەلەرگە قالا اكىمىنە قاتىستى تۇستاردى دا قوسىپ جاتىر. بۇل تاعى دا ءىستىڭ اقيقاتقا ەمەس، قىسىم كورسەتۋ مەن بەدەلگە نۇقسان كەلتىرۋگە باعىتتالعان ورەسكەل مانيپۋلياسيا ەكەنىن دالەلدەيدى. مەن مۇنداي مالىمدەمەلەردى ۇزىلدى-كەسىلدى جوققا شىعارامىن جانە ولاردى مويىندامايمىن"، - دەدى ول.

شەنەۋنىك دەنەسىندە ءالى دە قورعاسىن وقتارى بارىن ايتتى.

بۇعان دەيىنگى جاعداي

ەسكە سالايىق، بۇعان دەيىن رۋسلان بەردەنوۆ سوتقا كەلۋگە مىندەتتەلگەنى حابارلاندى. سوت وتىرىسىندا سۋديا ءابىنۇر قارابايەۆ رۋسلان بەردەنوۆتى 6 تامىزعا جوسپارلانعان نەگىزگى سوت پروسەسىنە مىندەتتى تۇردە قاتىسۋعا شاقىردى.