Qazaqstanda dekrettik tólemderdi esepteý tártibi ózgerdi. 8 sáýirden bastap eń joǵary járdemaqy mólsheri 595 myń teńge kiriske qarai esepteledi. Buryn bul tólemderde shekteý bolmaǵan, dep habarlaidy Dalanews.kz.
Máselen, jaqynda ana atanǵaly júrgen Qaraǵandy qalasynyń turǵyny Marina Aitova áleýmettik aýdarymdary joǵary bolýy úshin birneshe jerde jumys istep, tabysyn arttyrǵan. Alaida jańa erejege sáikes, ol kútkennen áldeqaida az járdemaqy alady. Bul týraly ol 31 -arnanyń Informbiýro jańalyqtar baǵdarlamasyna málimdedi.
“Men jumystan da, jeke kásipkerlikten de aqsha aýdaratyndyqtan, biz alatynymyzdan da kóp beretinimiz anyq. Eshkim barlyq shyǵyndy kótermeidi. Biraq biz ózimizge tiesilini alýymyz kerek. Áitpese ádiletsiz”, – dedi Qaraǵandy qalasynyń turǵyny Marina Aitova.
Eńbek jáne halyqty áleýmettik qorǵaý ministrliginiń jańa buiryǵy boiynsha, bala týýǵa bailanysty járdemaqyny esepteý kezinde eń joǵary kiris 595 myń teńgemen shekteledi. Osyǵan bailanysty áielder burynǵydai 2,5 million teńgege deiin járdemaqy ala almaidy. Onyń ústine, alynǵan tólemniń 10%-y zeinetaqy qoryna aýdarylady.
Memlekettik áleýmettik saqtandyrý qorynyń ókilderi bul ózgeris jasandy kiris kórsetýdiń aldyn alý jáne qordaǵy qarjynyń maqsatty jumsalýyn qamtamasyz etý úshin engizilgenin aitady.
“Bul túzetýler memlekettik áleýmettik saqtandyrý qory aktivteriniń maqsatty paidalanylýyn qamtamasyz etý jáne áleýmettik tólemderdi taǵaiyndaýdaǵy jalǵan shemalardy joiý maqsatynda ázirlendi”, – dedi memlekettik áleýmettik saqtandyrý qory Qaraǵandy oblysy boiynsha filialdarynyń bas mamany Gúlnar Qashaýbaeva.
Ekonomist Marat Ábdirahmanov bul ózgeris bala týý kórsetkishiniń tómendeýine ákelýi múmkin ekenin atap ótti. Ol ekonomikalyq turaqtylyq úshin basqa qadamdar jasaýdy usynady.
“Importymyz – 90 milliard dollar, iaǵni importqa táýeldiligimiz resmi málimet boiynsha 90%, osy jaǵdaidan shyǵý úshin óndiriske qosylǵan qun salyǵyn alyp tastap, importqa QQS qaldyrý kerek. Sonda biýdjet utady, azamattar da utady, óitkeni barlyq baǵa birden tómendeidi”, – dedi ekonomist Marat Ábdirahmanov.
Ministrliktiń málimetinshe, 2024 jyldyń qyrkúieginen beri 2 myńnan astam azamat tabysyn jalǵan kórsetkenin óz erkimen moiyndap, osynyń arqasynda áleýmettik saqtandyrý qory 4 milliard teńgeden astam qarjyny únemdegen.
