Eńbek jáne halyqty áleýmettik qorǵaý ministri Svetlana Jaqypova ótken jyly birqatar azamat áleýmettik tólemdi jasandy túrde ulǵaitýǵa tyrysqanyn jetkizdi, dep habarlaidy Dalanews.kz.
Ministrdiń sózinshe, 2024 jyly elimizde 1,4 million azamatqa jalpy somasy 958 milliard teńge kóleminde áleýmettik tólem berilgen.
"Júktilik pen bosanýǵa bailanysty tólemderge naqty shekteý qoiylmaǵandyqtan, keibir azamattar tabysyn jasandy túrde arttyryp, memleketten joǵary mólsherde tólem alýǵa tyrysqan. Mundai jaǵdailar áleýmettik ádilettilik qaǵidattaryna qaishy keledi. Óitkeni júieniń adal qatysýshylaryna ziian keltirip, biýdjetke artyq salmaq túsiredi", – dedi Jaqypova.
Resmi derekterge sáikes, 113 áiel zańsyz áreketteri arqyly 158,4 million teńge kóleminde tólem alǵan. Sonymen qatar 2024 jyldyń qyrkúieginen bastap 1,5 myńǵa jýyq azamat óz tabysyn ádeii arttyrǵanyn moiyndap, memleketke 3,4 milliard teńge qaitarǵan.
"Atalǵan máseleniń aldyn alý úshin zańnamalyq ózgerister toptamasyn ázirledik. Josparlanǵan reformalar áleýmettik saqtandyrý júiesiniń qarjylai turaqtylyǵyn qamtamasyz etýge baǵyttalǵan", – dep qosty ol.
