QR Qarjy mınıstrligi Memlekettik kirister komıteti (MKK) bank shottarynyń jappaı buǵattalýyna qatysty túsinikteme berdi, dep habarlaıdy Dalanews.kz.
Quzyrly vedomstvo 2024 jyly Qazaqstanda jalpyǵa birdeı deklarasıalaýdyń úshinshi kezeńi aıaqtalǵanyn eske salady. Osy bastama sheńberinde bıznes ókilderi — zańdy tulǵalardyń basshylary, quryltaıshylary men qatysýshylary, sondaı-aq dara kásipkerler jáne olardyń jubaılary 250.00 nysany boıynsha "kirý" deklarasıasyn tapsyra otyryp, Qazaqstandaǵy jáne sheteldegi óz aktıvterin deklarasıalady.
Budan bólek, buryn jalpyǵa birdeı deklarasıalaý júıesine kirgen azamattar 270.00 nysandy kirister men múlik týraly jyl saıynǵy deklarasıasyn usyndy.
"Deklarasıalardy tapsyrý merzimi aǵymdaǵy jyly 2024 jylǵy 1 qańtardan 16 qyrkúıekke deıin belgilendi, bul 8,5 aıdy qurady. Osy ýaqyt ishinde Memlekettik kirister organdary deklaranttardy buqaralyq aqparat quraldary, SMS-habarlamalar jáne basqa da tásilder arqyly deklarasıalardy tapsyrý qajettiligi týraly belsendi túrde habardar etti. Aqparattyq qoldaýǵa qaramastan, keıbir salyq tóleýshiler belgilengen merzimde deklarasıa tapsyrǵan joq. Mundaı jaǵdaılarda salyq organdary buzýshylyqtardy joıý úshin qosymsha 30 jumys kúnin bere otyryp, salyq zańnamasynda belgilengen merzimde jeke tulǵalarǵa salyq eseptiligin usynbaý týraly habarlama jiberedi. Osylaısha, azamattarǵa deklarasıa tapsyrý úshin 10 aı ýaqyt berildi", - deıdi MKK.
Vedomstvo málimetinshe, deklarasıalar, eger olarda salyq organynyń kody, salyq kezeńi nemese deklarasıa jasalǵan kúni sıaqty negizgi derekter bolmasa nemese deklarasıa "óńdeýden bas tartý" mártebesin alǵan bolsa, usynylmaǵan bolyp sanalady. Mundaı jaǵdaılarda salyq tóleýshiler deklarasıany ózgertý ádisimen qaıtaryp alyp, túzetilgenin berý arqyly buzýshylyqty óz betinshe joıa alady.
"Banktik shottar boıynsha shyǵys operasıalaryn toqtata turý tek dara kásipkerlerge jáne jeke praktıkamen aınalysatyn tulǵalarǵa ǵana qatysty ekenin atap ótken jón (Salyq kodeksiniń 118-baby). Deklarasıany ýaqytyly tapsyra almaǵan azamattar úshin birinshi ret eskertý túrinde ákimshilik jaýapkershilik qarastyrylǵan. Buzýshylyqtar joıylǵannan keıin banktik shottar boıynsha shyǵys operasıalary bir jumys kúninen keshiktirilmeı buǵattan sheshiledi", - deıdi mamandar.
Búgingi tańda, jalpyǵa birdeı deklarasıalaý boıynsha deklarasıa tapsyrýǵa mindetti 4,8 mıllıon adamnyń ishinen deklarasıany usynbaǵany úshin memlekettik kiris organdary 68,3 myń nemese 1,4% dara kásipker men jeke praktıkamen aınalysatyn tulǵalardyń banktik shottary boıynsha shyǵys operasıalaryn toqtatty.
"Búgingi tańda aýtqýshylyqtardy joıǵan 17,5 myńnan astam salyq tóleýshiniń nemese ókimderdiń jalpy sanynyń 26% boıynsha - banktik shottary boıynsha buǵattaý sheshildi", delingen MKK habarlamasynda.
