Birqatar laýazymdy qyzmet atqarǵan memleket qairatkeri, Shymkenttiń eks-ákimi Amalbek Tshan Dikii Armanmen arada bolǵan oqiǵa, oǵan Dariǵa Nazarbaevanyń aralasýy, Eski Qazaqstan ókilderiniń bilikten nelikten ketkisi kelmeitini týraly aitty, - dep habarlaidy Dalanews.kz.
Onyń sózinshe, zańǵa qarsy iske barǵan Nazarbaev áýletine tyqyr áli de taianbai tur, eshqandai shara qoldanylyp jatqan joq.
"Shyn mánisinde Qańtardan keiin halyqtyń kóńilin ornyna keltirý úshin Ádiletti Qazaqstan degen sózdiń maǵynasy tereń. Halyqtyń boiyna sińip, el ony kózimen kórýi kerek edi. Ókinishke qarai, bári uran bolyp qalyp jatyr.
Mysaly, burynǵy Prezidenttiń otbasyn alaiyq. Qazir qyzdarynyń reiderlikpen tartyp alǵan dúniesin jurt baqyraityp jatyr. Biraq eshqandai shara qoldanylmaidy. Ýtilsbor degendi bilesiz ǵoi. Mamin men Áliiasynyń jasaǵan tirlikteriniń bári, laýazymdy qyzmette otyrǵan adamnyń otbasynyń sondai jaǵdaiǵa barýy tek Qazaqstanda bolýy múmkin, - dedi Tshan Demokratiialy Qazaqstanǵa bergen suhbatynda.
Sonymen qatar, ol kezinde Almaty ákimi bolǵan Baibek, Esimovterdiń jemqorlyqqa qatysy bary ekenin aitty.
"Qatysy bolmasa, qashyp júre me? Almatyda qyzmet istegen ákimderdiń qai-qaisy bolmasyn, olardy teksere kelseńiz bári de shyǵady.
Baibek taza bolsa, nege qashyp júr?! Esimov te solai. Mynaý kimdiki deseń, jurttyń bári "Esimovtiki" deidi. Mynaý kimdiki deseń, "Baibektiki" deidi.
Olardyń kim ekenine halyqtyń ózi baǵasyn berip jatyr. Kópshilik qalt aitpaidy dep durys aitady", - deidi ol.
Shymkent ákimi bolǵan Amalbek Tshannyń sózinshe, Dikii Arman onyń jienin soqqyǵa jyqqan.
"Dikii Arman asyp bara jatqan eshkim emes. Qasyna on-on bes adam jinap alyp júrgen adam ózinshe batyr bolady ǵoi. 2005-jyldary depýtat bolyp júrgen kezde Dikii Armannyń is-áreketine kýá bolǵanmyn.
Jienim, týǵan qaryndasymnyń balasynyń avtobazary bolatyn. Sony basqaratyn. Sol jerge (Dikii Arman - esk.) kóligin sataiyn dep barǵan. (Jieni - esk.) ózi dáý jigit. Sony bular 4-5 adam jabylyp, ábden uryp, ólerdei sabap tastaǵan. Ol kezde depýtatpyn. Prokýratýraǵa berip, sóitip sol kezde qamatqanbyz", - dedi ol suhbatynda.
Amalbek Tshan osy jaitqa keiin Dariǵa Nazarbaeva aralasyp, Dikii Arman bostandyqqa shyqqanyn jetkizdi.
"Artynsha Dikii Armandy Dariǵa Nazarbaevanyń tikelei aralasýymen shyǵaryp aldy. Parlamentte de bul máseleni kótergenmin. Parlamentte Dikii Arman bilikpen sybailas bolyp, osyndai tirlikter istep jatqanynyń bárin aittym. Artynsha ony bosatty. Onyń haty bar. Mende hatynyń kóshirmesi áli kúnge deiin bar.
...Bári bolǵan oqiǵa. Sol kezdegi biliktiń ábden kózin shel basyp ketken. 2005-2006 jyldary bastalǵan, odan beri qansha zaman ótti?!" - dedi memleket qairatkeri.
Amalbek Tshan Nazarbaev áýletiniń taǵy bir ókili Timýr Qulybaevtyń bylyqtaryn áshkereledi.
"Ózderińiz bilesizder, keiingi kezde olimpiadalyq jarystarda, álemdik deńgeidegi jarystarda Qazaqstan sportshylarynyń deńgeii óte tómen túsip ketti. Qandai bir is-shara bolmasyn, óndiris bolsyn, sport bolsyn, bilim salasy bolsyn, júiesiz eshbir istiń alǵa jyljýy múmkin emes. Sportta da júiesiz tirlikter boldy.
Sebebi kezinde Qulybaevtyń yqpalymen Sport týraly zańdy ózgertip, qarajat bólý máselesiniń bárin Olimpiadalyq komitetke aýystyryp, burynǵy qalyptasyp qalǵan júieden aýytqyǵan jaǵdai boldy.
Jankúierlerdiń arasynda da úlken alańdaýshylyq boldy. Tokioda Olimpiada bolǵan kezde Qulybaevtyń ainalasynda júrgenderdiń bári Olimpiadaǵa baryp, jankúier bolyp otyrdy. Kórermender óziniń renishin bildirip jatty", - dedi ol.
Onyń pikirinshe, Qulybaevtyń Olimpiada komitetinde qyzmetke kelýi - jeke qalaýy.
"Qulybaevtyń úlken biznes imperiiasy bar ǵoi, menińshe, sportqa qaraýǵa ýaqyty bolǵan joq. Óz sharýasymen júrdi. Olimpiada komitetine tóraǵa bolyp kelýiniń ózi ambitsiialyq qalaýy dep oilaimyn. Bári sol kisiniń qolynda, qai jerge qyzmetke baramyn, ne isteimin dese de, onyń bárine múmkindikter boldy. Sol múmkindikti paidalanyp kelgen is-áreketi dep oilaimyn", - dedi Amalbek Tshan.
Jýyrda Olimpiada komitetine Golovkin basshylyqqa keldi. Al onyń komandasynda Eski Qazaqstannyń beldi músheleri bar.
"Golovkinǵa orynbasar bolyp bekitkenderdiń bári de baiaǵy Eski Qazaqstannyń milliarderleri. Naǵyz korrýptsionerdiń bári sol jerde júr. Olar - tek milliarder emes, korrýptsionerler, ony ashyp aitý kerek. Ony el de, jurt ta biledi.
Bir Maminniń ózi ne turady? Onyń temirjolda istegen nárseleriniń bári - milliardtap, trilliondap jatqan aqsha.
Premer-ministr bolyp júrgende qurylystar salamyz dep ashqanynyń bári kózboiaýshylyq bolyp shyqty, jalǵasy joq.
Ahmetov, mysaly, olardyń báriniń de jasy kelgen. Olardy Qazaqstan sporty qyzyqtyrady dep aita almaimyn.
Eger patriot bolsa, olar adal qyzmet istegen bolar edi. Sondai urlyqtyń arqasynda milliardtaǵan qarajatqa ege bolyp otyrǵan adam sport úshin jany ashidy dep aita almaimyn. Olarǵa ásheiin hobbi siiaqty nárse. Olardyń eń negizgi máselesi - urlanǵan aqshalaryn retteý, biznesteriniń bárin retke keltirý.
Qulybaev ta, Mamin de, Ahmetov te jiǵan dúniesiniń bir shetin bilse, ekinshi shetin bilmeidi ǵoi dep oilaimyn. Sebebi az ýaqyttyń ishindegi jinaǵan dúniesi adamnyń uǵymyna kirmeidi", - dedi ol.
Buǵan deiin de qoǵam qairatkeri "Qala men Dala" gazetine bergen suhbatynda eldegi sporttyń jai-kúii týraly aitqan edi.
"Bizdiń el Olimpiada chempiondaryna sumdyq syiaqy beredi. Chempion bolǵan sportshy Úkimetten 250 myń dollar alady. Birazy dopingmen ustaldy. Oilap kórińiz, memleket sol sportshyǵa qanshama qarjy jumsady. Onyń jattyǵýy, halyqaralyq jarysqa qatysýyna ketetin shyǵynnyń bárin memleket kóterdi emes pe?
Qazir qazaq qoǵamynyń sana-sezimi ósti. Mundai asta-tók syilyq berýdi kópshilik qabyldai almaidy. Bul úrdis birte-birte saiabyrsýy kerek.
Eshqandai sheneýnik sportshylarǵa qaltasynan aqsha bermeidi. Onyń bári halyqtyń aqshasy. Sondyqtan qomaqty syiaqy birtindep tómendeýi kerek. Mádeniet osylai qalyptasaryn umytpaǵan jón..." - dedi ol.
