Túrkistanda jyl saiyn jańa sport nysandarynyń sany kóbeiip keledi. Olardyń qurylysy jiti qadaǵalaýǵa alynǵan. Túrkistan oblysynyń ákimi Darhan Satybaldy Bekzat Sattarhanov atyndaǵy sport kesheninde boldy. Oblys basshysy júrgizilip jatqan jumystardy pysyqtap, jaýapty tulǵalarǵa keshenniń ishki dizainy boiynsha tapsyrmalar júktedi. Jańa nysan jaqyn kúnderi ashylady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Zamanaýi sport kesheninde Á.Nurmahanov atyndaǵy sport mektebiniń ujymy ornalasady. Keshende sporttyq is-sharalar men boks, kúres, taekvondo jáne oiyn sport túrlerinen oqý-jattyǵý jiyndary ótkiziletin bolady.
Sport kesheni 3 qabattan turady. Zamanaýi úlgidegi ǵimaratta sport jáne jattyǵý zaldary, 8 kiim aýystyratyn bólme, jýynatyn bólmeler, konferents-zal, ashana, meditsinalyq kómek kórsetý kabineti, kútý zaly, qonaqtardy kútý bólmesi, jattyqtyrýshylarǵa jáne ákimshilik quramǵa arnalǵan bólmeler bar.
Ǵimarattyń jumystaryna «Stroi Servis–7» JShS jaýapty. Sport kesheniniń jalpy alańy – 1,8 gektar. Syiymdylyǵy 1000 adamdy quraityn nysannyń aýmaǵy – 7 248,0 sharshy metr. Jalpy quny – 3,1 mlrd. teńge.
Memleket Basshysy Qasym-Jomart Toqaev buqaralyq sportty damytý máselesine erekshe nazar aýdarýda. Oblysta turǵyndarymyzdyń salaýatty ómir saltyn qalyptastyrý jáne buqaralyq sportty damytý maqsatynda sońǵy 3 jylda 100-den astam sport nysany paidalanýǵa berildi. Olardyń arasynda «Túrkistan-Arena» stadiony, «Muz saraiy», «Tennis ortalyǵy», «Olympic Center» sport kesheni jurtshylyqtyń oń baǵasyna ie boldy. Sonymen qatar 7 tennis korty salynyp, jalpy uzyndyǵy 51 shaqyrym velojol tóselgen. Oktiabr Jarylqapov atyndaǵy stadion jańartyldy.
