Almaty qalasynyń ákimi Darhan Satybaldy megapolistegi birqatar áleýmettik jáne infraqurylymdyq nysandy aralap, turǵyndardyń ótinishterimen, abattandyrý jumystarynyń nátijelerimen jáne áleýmettik mekemelerdegi jaǵdaimen tanysty, dep habarlaidy Dalanews.kz
Jumys sapary Bostandyq aýdanyndaǵy Rams City turǵyn úi kesheninen bastaldy. Munda ákim turǵyndardyń ótinishin tyńdady. Ásirese, eski úilerde turatyn azamattar kóshý máselesin kóterdi. Darhan Satybaldy bul máseleni jeke baqylaýyna alatynyn jáne jaýapty organdarmen birlesip qarastyrylatynyn atap ótti.
Rams City turǵyn úi kesheniniń turǵyndary da birqatar máseleni aitty. Olar gidrooqshaýlaý, jol qozǵalysyn uiymdastyrý jáne politsiia pýnktin ornatý. Ákim osy baǵyttar boiynsha tiisti qyzmetterge naqty sharalar qabyldaýdy jáne jaǵdaidy turaqty baqylaýda ustaýdy tapsyrdy.
Keiin Darhan Satybaldy Bostandyq aýdanyndaǵy Toraiǵyrov kóshesiniń boiyndaǵy abattandyrylǵan júrginshiler aimaǵymen tanysty. Bul joba «Halyq qatysatyn biýdjet» baǵdarlamasy aiasynda júzege asyrylǵan. Abattandyrylǵan aýmaqtyń jalpy kólemi – 2,5 gektar.
Qaita jóndeý barysynda trotýarlar tolyq jańartylyp, jiektastar ornatyldy, múmkindigi shekteýli azamattar úshin qoljetimdi orta qamtamasyz etildi. Velojoly qalpyna keltirilip, jaryqtandyrý júiesi jańǵyrtyldy. Energiia únemdeitin shamdarmen jabdyqtalǵan jańa sham tirekteri ornatylyp, bul túngi ýaqytta qaýipsizdik deńgeiin arttyrdy. Sondai-aq zamanaýi balalar jáne sport alańdary salyndy, qaýipsiz jabyn tóseldi, 200-den astam aǵash pen 1 500 buta egildi, avtomatty sýarý júiesi ornatyldy.
Jumys saparynyń sońynda Darhan Satybaldy Áýezov aýdanyndaǵy «Parasat» jáne «Shańyraq» áleýmettik qyzmet kórsetý ortalyqtaryna bardy.
«Parasat» ortalyǵy 2005 jyly qurylǵan jáne psihonevrologiialyq aýrýlary bar balalar men eresekterge arnaýly áleýmettik qyzmet kórsetedi. 2025 jyly júrgizilgen kúrdeli jóndeýden keiin munda ońaltý, delfinoterapiia, ippoterapiia, shyǵarmashylyq sheberlik jáne VR-terapiia kabinetteri ashyldy. Ortalyq 360 adamǵa qyzmet kórsetýge arnalǵan, munda 132 qyzmetker eńbek etedi.
– Biz erekshe qajettiligi bar ár azamat ózine qamqorlyq pen qoldaýdy sezinetin jaǵdai jasaýymyz kerek. Mundai ortalyqtar adamdarǵa beiimdelýge, kásibi kómek alýǵa jáne tolyqqandy ómir súrýge múmkindik beredi, – dedi Darhan Satybaldy.
«Shańyraq» ortalyǵy 2001 jyldan beri jumys isteidi jáne egde jastaǵy azamattar men I-II toptaǵy múgedektigi bar adamdarǵa arnalǵan statsionarlyq mekeme bolyp tabylady. Qazirgi ýaqytta munda 292 adam turady, olardyń 108-i – múgedektigi bar azamattar. Ortalyqta meditsinalyq, psihologiialyq jáne mádeni qyzmetter kórsetiledi. Kúrdeli jóndeý júrgizilip, aýmaq abattandyryldy, beinebaqylaý ornatyldy jáne tuzdy bólme ashyldy.
Sapar qorytyndysynda qala ákimi Almatynyń qalalyq infraqurylymyn damytý, aýdandardy abattandyrý jáne turǵyndarǵa kórsetiletin áleýmettik qyzmetterdiń sapasyn arttyrý baǵytyndaǵy júieli jumysty jalǵastyrýdy tapsyrdy.
