Almaty qalasynyń ákimi Darhan Satybaldy Bostandyq aýdanyndaǵy birqatar infraqurylymdyq jobalardyń júzege asý barysyn tekserdi,- dep habarlaidy Dalanews.kz
Nazarbaev dańǵyly men Gandi kóshesiniń qiylysyndaǵy skverdiń jalpy aýmaǵy – 4,16 gektar. Qazirgi ýaqytta munda toǵan salý, uńǵymalar burǵylaý jáne injenerlik jeliler tartý jumystary júrgizilýde. Qala ákimi kógaldandyrýǵa erekshe mán berýdi tapsyrdy.
Ál-Farabi dańǵyly boiyndaǵy Esentai ózeniniń ústindegi kópirdi qaita jańartý jumystarynyń 60 paiyzy aiaqtalǵan. Jasyl jelekti saqtaý maqsatynda qurylys ýaqytsha toqtatylyp, jobaǵa ózgerister engizilgen. Darhan Satybaldy qurylys belgilengen merzimde aiaqtalyp, jaǵalaý aimaǵynyń kórkem beinesi saqtalýy tiis ekenin eskertti.
1 500 oryndyq jańa mekteptiń qurylysy boiynsha árleý jáne abattandyrý jumystary júrgizilýde. Oqý jihazdary jetkizilgen. Mektep jańa oqý jylynda paidalanýǵa beriledi.
Toraiǵyrov kóshesi boiyndaǵy jaiaý júrginshiler aimaǵy «Halyq qatysatyn biýdjet» jobasy aiasynda júzege asyrylýda. Jumystar qazan aiynda tolyq aiaqtalady. Aýmaǵy kógaldandyrylyp, trotýarlar, velojoldar, sport jáne balalar alańdary jańartylyp, jaryqtandyrý júiesi ornatylady.
Gagarin dańǵylynyń Jandosov pen Abai kósheleriniń aralyǵyndaǵy kórkeitý jumystary aiaqtaldy. Jańa oryndyqtar qoiylyp, jaryq shamdary ornatylǵan, sport alańdary men sýarý júieleri qalpyna keltirilgen.
Sapar qorytyndysynda qala ákimi Darhan Satybaldy aqaýy joq nemese aitarlyqtai zaqymdanbaǵan asfalt pen jiektastardy aýystyrý faktilerine qatysty pikir bildirip, mundai jumystar naqty qajettilik týyndaǵan jaǵdaida ǵana júrgizilýi tiis ekenin qatań eskertti.
