Búgin Parlamentte Azat Perýashev bastaǵan «Aq jol» partiiasynyń depýtattary el múddesi jolynda qyzmet etken qalamgerdiń esimin ulyqtaý máselesin kóterip, jańadan taǵaiyndalǵan vitse-premer Ermek Kósherbaevtyń atyna depýtattyq saýal joldady. Sonymen qatar «aqjoldyqtar» Qazaqstannyń Halyq jazýshysy, marqum Qabdesh Jumadildiń 90 jyldyń mereitoiyn el kólemende atap ótý meselesin kóterdi, – dep habarlaidy Dalanews.kz «Aq jol» demokratiialyq partiiasynyń baspasóz qyzmetine silteme jasap.
– Biylǵy jyly elimizde birneshe kórnekti tulǵalardyń mereitoilary ótetini málim. Sonyń ishinde, Ánýar Álimjanovtyń 95-jyldyǵy, Tumanbai Moldagalievtyń 90-jyldyǵy bar. Osy oqiǵalarǵa jaýapty organdar daiyndalýda.
«Aq jol» Demokratiialyq partiiasy da alǵa qarap, kelesi jylǵa óz usynysyn qosaiyn dep otyr. Halyq jazýshysy, qoǵam qairatkeri Qabdesh Jumadil kelesi jyly 90 jasqa tolar edi.
Qalamgerdiń artynda 10 roman, 20-dan astam povest, 70-ten astam shyǵarma qaldy. «Sońǵy kósh», «Daraboz», «Qazdar kaityp barady» syndy mol mura ádebiettiń altyn qoryna endi.
Jazýshy, óz eńbekterinde qazaq halqynyń táýelsizdigi jolyndaǵy kúresin shynaiy beinelep, ult bostandyǵy úshin janyn qiǵan erler, onyń ishinde Bógenbai, Qabanbai, Ospan batyrlardyń azattyq jolyndaǵy kúresin tereń zerttep, olardy tek sarbazdar retinde ǵana emes, tutas halyqtyń taǵdyry úshin kúresken tulǵalar retinde sipattaidy.
Qabdesh Jumadil barlyq shyǵarmalarynda ultyn ulyqtap, tilimiz ben dinimiz úshin basyn báigege tigip, tarihymyzdy qara kúieden tazartyp, eldik rýhymyzdy kóterý jolynda jasaǵan jankeshti eńbegin moiyndaǵanymyz jón.
Sonymen qatar ol tek jazýshy ǵana emes, sondai-aq ult taǵdyryna erekshe úles qosqan qairatker edi.
Asharshylyq kezinde totalitarly júieden qashyp arǵy bet asqan qarakóz qandastarymyzdyń taǵdyryna beijai qaramai, olardyń kóshi-qony, til jáne mádeniet máselelerin ashyq kóterip, ulttyq múddeni qorǵaý jolynda atsalysty.
Alpysynshy jyldary Qytaida saiasi jaǵdai kúrdelene bastaǵanda, Qabdesh Jumadil qazaq baýyrlarynyń aýyr bolashaǵyna arasha tústi.
Máskeýge deiin baryp, baýyrlarymyzdyń kóshi-qonyn uiymdastyrý máselesin kóterdi. Nátijesinde, 1962 jyly 200 myńnan astam qandasymyzdyń tarihi otanyna oralýyna sebepker boldy.
Bul oqiǵa el tarihynan airyqsha oryn aldy. Sol kezden óz jerinde ulttyq azshylyqqa ainalǵan halqymyzǵa bas qosyp, sanymyzdy kóbeitip, oralǵan qandastarymyzdyń urpaqtary ósip-ónip, elimizdiń laiyqty azamattary bop, Qazaqstan damýyna óz úlesterin qosýda.
Qabdesh aǵamyzdyń kózin kórgen zamandastary retinde, erligin este saqtaý jáne ony laiyqty túrde qurmetteý - bizder úshin borysh pen abyroi.
Onyń mereiin – toi retinde emes, el birligi men, erlik pen adaldyqty ulyqtaityn shara retinde uiymdastyrý oryndy.
Bul tek ótkendi qurmetteý emes, sonymen qatar bolashaq urpaqqa rýhani baǵyt berý, kim ekenimizdiń tereń maǵynasyn túsindirý úshin de múmkindik.
«Erim deitin el bolmasa, elim deitin er qaidan bolsyn».
Osyndai tulǵalardy maqtan tutyp, olardyń amanatyna adal bolý - bizdiń paryzymyz.
Osyǵan bailanysty, «Aq jol» Dempartiiasy qazaq halqynyń birtýar qalamgeri, ári janashyry Qabdesh Jumadildiń 90-jyldyǵyn joǵary deńgeide atap ótkizýdi usynamyz.
Sonymen qatar, onyń esimin ulyqtaý maqsatynda eldi-mekenderdiń kósheler men nysandarǵa atyn berý máselesin qarastyrýdy jón dep sanaimyz.
Qurmetpen, «Aq jol» fraktsiiasynyń depýtattary
A. Perýashev
S. Erýbaev
E. Barlybaev
D. Espaeva,
Q. Isa
E. Beisenbaev
