Aimaq basshysy Eleke Sazy ústirtindegi arheologiialyq jumystardyń barysymen tanysty. Onda erte saq dáýirinen bastap orta túrki kezeńine deiingi birneshe obadan turatyn úlken qorym tabyldy. Álemge áigili ǵalym Zeinolla Samashev úsh jyldan beri osynda qazba jumystaryn júrgizip keledi.
[caption id="attachment_65229" align="aligncenter" width="489"]
Tarihshy ǵalymdar men arheologtardyń jumysynyń arqasynda aimaqtyń qazirgi turǵyndarynyń ejelgi ata-babalary osy jerde otyryqshy ómir saltyn ustanǵany jáne ártúrli salalarda, sonyń ishinde metall óndirý jáne óńdeý salasynda úlken jetistikke jetkeni belgili boldy.
Tabylǵan artefaktiler men quraldar balqytylǵan metaldan túrli buiymdar jasaityn «sheberhanalar» bolǵanyn aiǵaqtaidy. Júrgizilgen qazba jumystary ejelgi qazaqtardyń aýyl sharýashylyǵy salasymen ainalysyp, jerdi igerýde óte saýatty bolǵandaryn dáleldeidi.
– Osy jerden tabylǵan jáne aldaǵy ýaqytta da tabylatyn eksponattar bizdiń murajailarymyzdyń qoryn tolyqtyryp qana qoimai, Qazaqstan tarihyna qatysty kóptegen suraqtarǵa jaýap beretinine senimdimin. Budan bólek, taǵy 20 ýchaske bar, olardy da muqiiat zertteý qajet, – dedi ǵalymdarmen kezdesken oblys ákimi Danial Ahmetov.
[caption id="attachment_65230" align="aligncenter" width="438"]
Aita ketý kerek, Aqbaýyr arheologiialyq kesheniniń qazba jumystaryna qazaqstandyq ǵalymdarmen birge halyqaralyq ekspeditsiia músheleri jáne Sársen Amanjolov atyndaǵy Shyǵys Qazaqstan memlekettik ýniversitetiniń, Shákárim atyndaǵy ýniversitettiń, Geodeziia jáne kartografiia joǵary kolledji men respýblikanyń basqa da oqý oryndarynan otyzdan astam stýdent qatysyp jatyr. Sonymen qatar, munda tabylǵan artefaktilerdi zertteitin jyljymaly zerthana da bar.
