Búgin Qyzylordada «Dala kúni – 2026» is-sharasynda Y.Jaqaev atyndaǵy Qazaq kúrish sharýashylyǵy ǵylymi-zertteý institýtynyń egis alqabyna alǵashqy oraq salý rásimi ótti, dep habarlaidy dalanews.kz.
Oǵan oblys ákimi Murat Ergeshbaev, Aýyl sharýashylyǵy vitse-ministri Ermek Kenjehanuly, Sý resýrstary jáne irrigatsiia vitse-ministri Jandos Salimov, Ulttyq agrarlyq ǵylymi-bilim berý ortalyǵynyń basqarma tóraǵasy Baýyrjan Asanov, ministrlik ókilderi, elimizdiń jetekshi ǵylymi-zertteý institýttarynyń basshylary, qala jáne aýdan ákimderi, oblystyq basqarmalar men departamentterdiń basshylary, sý sharýashylyǵy mekemeleri men sharýa qojalyqtarynyń tóraǵalary, qarjy institýttarynyń ókilderi qatysty.
Aimaq basshysy eńbekkerlerdi quttyqtap, biylǵy jaýapty naýqanǵa daiyndyq barysynda atqarylǵan jumystarǵa toqtaldy.
«Syr eli – ejelden diqanshylyq dástúri ornyqqan berekeli óńir. Aq kúrishimen aty shyqqan aimaq búginde elimizdiń azyq-túlik qaýipsizdigine eleýli úles qosyp keledi. Memleket basshysy Qasym-Jomart Kemeluly jahandyq azyq-túlik naryǵynda básekege qabilettilikti arttyrý úshin ǵylymdy damytýdy, sonyń ishinde tuqym sharýashylyǵyn jandandyrýdy atap ótken bolatyn. Basty mindet – dástúrli salanyń áleýetin zamanaýi tehnologiia, ǵylym jáne innovatsiiamen sabaqtastyryp, sý resýrstaryn tiimdi paidalaný arqyly mol ónimge qol jetkizý. Bul rette memlekettik qoldaý men ǵylym múmkindigin sharýalardyń tájiribesimen ushtastyrý mańyzdy. Barsha diqan qaýymyn kúrishke oraq túsýimen quttyqtaimyn! Eńbekterińiz berekeli bolyp, aq kúrishten mol ónim jinalsyn. Syr óńiriniń yrysy arta bersin!», – dedi Murat Nálqojauly.
Basqosýda ala jazdai aptap ystyqta mańdai terin tógip, el yrysyn eselegen mártebeli eńbek adamdary marapat tórinen kórindi.
Jiynda aýyl sharýashylyǵy tehnikalarynyń kórmesi uiymdastyrylyp, qatysýshylar zamanaýi tehnikalarmen jáne olardyń múmkindikterimen tanysty.
Y. Jaqaev atyndaǵy Qazaq kúrish sharýashylyǵy ǵylymi-zertteý institýty – kúrish selektsiiasymen jáne tuqym sharýashylyǵymen ainalysatyn biregei agrarlyq uiym. Biyl institýttyń materialdyq-tehnikalyq bazasyn jańǵyrtýǵa respýblikalyq biýdjetten 4,2 mlrd teńge bólinip, zamanaýi selektsiialyq tehnikalar men tuqym zaýyttary alyndy. Bul tuqym sharýashylyǵynyń damýyna, onyń ishinde otandyq kúrish sorttarynyń sapasy men egis kóleminiń artýyna oń áserin tigizeri sózsiz.
Qabyldanǵan júieli sharalardyń nátijesinde vegetatsiialyq kezeń turaqty ótip, egis alqaptary josparǵa sáikes sýmen qamtamasyz etildi. Odan bólek, sý únemdeý tehnologiialaryn qoldaýǵa 2026-2028 jyldarǵa 34 mlrd. teńgeden astam qarjy bólindi.
Memleket basshysynyń sýdy kóp qajet etetin daqyldar kólemin ońtailandyrý tapsyrmasyna sáikes, biyl kúrish alqaby qysqartylyp, 70 myń gektarǵa egildi. Sý únemdeý tehnologiialaryn engizý jáne ártaraptandyrý baǵytynda iri investitsiialyq jobalar qolǵa alyndy.
