Qarqaraly aýdanynda qoǵamdyq qaýipsizdikti qamtamasyz etýge baǵyttalǵan zamanaýi Jedel basqarý ortalyǵy jumysyn bastady. Ortalyqqa aýdan aýmaǵyndaǵy myńdaǵan beinebaqylaý kamerasy qosylyp, politsiia qyzmetkerlerine kóshelermen qatar, bilim berý uiymdary men balabaqshalardaǵy qaýipsizdikti bir jerden baqylaýǵa múmkindik berdi, dep habarlaidy dalanews.kz.
Qaraǵandy oblysy politsiia departamenti bastyǵynyń orynbasary Janat Qaqajanov Qarqaraly aýdanyna jumys sapary barysynda jańadan iske qosylǵan Jedel basqarý ortalyǵynyń jumysymen tanysty.
Oblys ortalyǵynan 220 shaqyrym qashyqta ornalasqan Qarqaraly – tabiǵaty kórkem, týristik áleýeti joǵary óńir. Aýdanda 40 myńǵa jýyq turǵyn turady. Munda qoǵamdyq tártipti saqtaý, azamattardyń qaýipsizdigin qamtamasyz etý jáne qylmystyń aldyn alý politsiia qyzmetiniń negizgi mindetteriniń biri.
Osy baǵytta Qarqaraly aýdandyq politsiia bóliminde zamanaýi talaptarǵa sai Jedel basqarý ortalyǵy iske qosyldy. Onyń jumysyna aýdandyq prokýratýra men jergilikti atqarýshy organ ókilderi de tanysty.
Qazirgi tańda Jedel basqarý ortalyǵyna aýdan ortalyǵynda ornalasqan 2 541 beinebaqylaý kamerasynyń 954-i qosylǵan.
Sonymen qatar aýdandaǵy 42 bilim berý uiymyndaǵy 898 kameranyń 601-i jáne 4 balabaqshadaǵy 125 beinebaqylaý kamerasy ortalyqtyń júiesine engizilgen.
Bul politsiia qyzmetkerlerine aýdan ortalyǵyndaǵy kriminogendik ahýaldy turaqty baqylaýmen qatar, bilim berý uiymdary men mektepke deiingi mekemelerdegi qaýipsizdik jaǵdaiyn da jedel baqylaýǵa múmkindik beredi.
Beinebaqylaý júiesiniń tiimdiligi qazirdiń ózinde baiqalýda.
«Jedel basqarý ortalyǵynyń beinebaqylaý kameralary iske qosylǵaly beri 40-tan astam quqyq buzýshylyqtyń joly kesilip, birqatar qylmystyń beti ashyldy. Bul – aýdan ortalyǵynda zań men tártipti qamtamasyz etip, quqyq buzýshylyqtardyń aldyn alýǵa múmkindik beretin mańyzdy qural», – dedi Qarqaraly aýdandyq politsiia bólimi bastyǵynyń orynbasary Bekulan Tashmaǵanbetov.
Jedel basqarý ortalyǵynyń taǵy bir ereksheligi – dronnan túsirilgen beinejazbany onlain rejimde baqylaý múmkindigi.
Bul múmkindik ásirese kólikpen jetý qiyn taýly aýmaqtarda izdestirý jumystaryn júrgizý, joǵalǵan adamdardy izdeý, sondai-aq zańsyz qoqys oryndaryn anyqtaý kezinde tiimdi paidalanylmaq.
Qarqaraly qalasynyń ákimi Aslan Rahymbergenovtiń aitýynsha, óńirge keletin týrister sanynyń artýyna bailanysty qaýipsizdik máselesine de erekshe mán berilýde.
«Qarqaraly – týristik áleýeti joǵary óńir. Munda elimizdiń ár aimaǵynan kóptegen demalýshylar keledi. Keide taýǵa shyqqan azamattardyń adasyp qalatyn jaǵdailary da kezdesedi. Sondyqtan dronnan túsirilgen beinejazbany Jedel basqarý ortalyǵynan onlain baqylaý múmkindiginiń paida bolǵany qýantady. Qajet bolǵan jaǵdaida tótenshe jaǵdai kezinde aýmaqtaǵy ahýaldy osy ortalyq arqyly baqylaýǵa bolady. Osyǵan bailanysty aldaǵy ýaqytta politsiia bólimine qosymsha dron alý máselesin qarastyryp jatyrmyz», – dedi qala ákimi.
Jumys sapary barysynda Janat Qaqajanov Jedel basqarý ortalyǵynyń tehnikalyq múmkindikterimen tanysyp, onyń jumysyn odan ári jetildirý boiynsha naqty tapsyrmalar berdi.
Politsiia departamenti bastyǵynyń orynbasary beinebaqylaý júiesinde qoldanylyp otyrǵan jasandy intellekt tehnologiialarynyń sanyn arttyrýdy tapsyrdy.
Qazirdiń ózinde jasandy intellekt elementteri bar kameralar quqyq buzýshylyq belgilerin anyqtaýǵa jáne politsiia qyzmetkerleriniń oqiǵaǵa jedel den qoiýyna múmkindik berip otyr. Mundai tehnologiialardyń sanyn kóbeitý beinebaqylaý júiesiniń tiimdiligin arttyryp, politsiianyń aldyn alý jumystaryn jańa deńgeige kóterýge múmkindik beredi.
Janat Qaqajanov sondai-aq Jedel basqarý ortalyǵyna qosylǵan beinebaqylaý kameralarynyń sanyn kezeń-kezeńimen arttyryp, aýdannyń qaýipsizdik júiesin zamanaýi tsifrlyq tehnologiialarmen odan ári kúsheitýdi tapsyrdy.
Qarqaralydaǵy Jedel basqarý ortalyǵy – «Zań men tártip» qaǵidatyn qamtamasyz etýge baǵyttalǵan zamanaýi tsifrlyq sheshimderdiń biri. Onyń múmkindikterin keńeitý arqyly politsiianyń quqyq buzýshylyqtyń aldyn alý, qylmysty jedel anyqtaý jáne azamattardyń qaýipsizdigin qamtamasyz etý jumystary odan ári kúsheitilmek.
