Taldy aýylynyń ýchaskelik inspektory qoǵamdyq tártipti qamtamasyz etýmen qatar, aýyl jastaryn sportqa baýlityn zal ashty, dep habarlaidy dalanews.kz.
Tútini túzý ushqan Taldy aýylynyń tarihy sonaý 1968 jyldan bastaý alady. Búginde munda 500-den astam turǵyn tatý-tátti ǵumyr keship, negizinen mal sharýashylyǵy men eginshilikti kásip etip otyr. Aýyldaǵy qoǵamdyq qaýipsizdikti qamtamasyz etip, turǵyndardyń tynyshtyǵyn kúzetip júrgenderdiń biri – Shet aýdandyq politsiia bóliminiń ýchaskelik politsiia inspektory, politsiia kapitany Muhamedqali Sadýaqasov.
Bul qyzmet oǵan jai ǵana jumys emes. Óitkeni Taldy – onyń kindik qany tamǵan týǵan jeri.
Muhamedqali Sadýaqasov ishki ister organdaryndaǵy eńbek jolyn 2012 jyly jyldam qimyldaityn arnaiy jasaq bóliminen bastaǵan. Biyl naýryz aiynan bastap týǵan aýylyna ýchaskelik politsiia inspektory bolyp oralyp, el tynyshtyǵyn qamtamasyz etý isine bilek sybana kiristi.
Týǵan jerge týyn tikken tártip saqshysy eń aldymen aýyldyń ahýalyn zerdelep, jergilikti bilik ókilderi jáne aýyl aqsaqaldarymen birlesip, qoǵamdyq tártipti nyǵaitýǵa baǵyttalǵan jumystardy qolǵa aldy.
– Aýyldyq jerdegi basty máselelerdiń biri – mal urlyǵynyń aldyn alý. Osy baǵytta jergilikti atqarýshy bilik ókilderimen birqatar jumystar atqardyq. Qazirgi tańda bul baǵyttaǵy jumys jolǵa qoiyldy. Sonymen qatar aýyl turǵyndarynyń aýyzbirshiliginiń arqasynda Taldy ishimdiksiz aýyl atandy, – deidi ýchaskelik politsiia inspektory Muhamedqali Sadýaqasov.
Politsiia kapitanynyń aitýynsha, aýyldaǵy tártiptiń saqtalýy tek quqyq buzýshylyqtyń aldyn alýmen shektelmeidi. Ásirese jastardyń bos ýaqytyn tiimdi uiymdastyrý – qaýipsiz qoǵam qalyptastyrýdyń mańyzdy tetigi.
Osyny eskergen ýchaskelik inspektor Taldy aýyldyq okrýginiń ákimine usynys aityp, bos turǵan úidi jastardyń sportpen shuǵyldanýyna arnalǵan jattyǵý zalyna ainaldyrýdy qolǵa alǵan.
Ózi jaýyngerlik sambodan sport sheberi bolǵan Muhamedqali Sadýaqasov endi jinaǵan tájiribesin aýyl balalaryna úiretýdi maqsat etip otyr.
– Ózim jaýyngerlik sambodan sport sheberimin. Sondyqtan bilgenimdi jastarǵa úiretip, olardyń bos ýaqytyn tiimdi ótkizýine múmkindik jasaǵym keldi. Bala tárbiesine arnalǵan sport zalyn ashý – kópten bergi armanym edi. Búginde sol armanymdy júzege asyryp jatyrmyn. Aldaǵy ýaqytta osy jerden eldiń tynyshtyǵyn kúzetetin, zań men tártipti tý etetin jastar shyqsa, eńbegimniń aqtalǵany, – deidi ol.
Jańa sport zaldyń ashylý saltanatyna Qaraǵandy oblysy Politsiia departamenti men aýdandyq politsiia bóliminiń basshylyǵy, aýdan ákimi, aýyl aqsaqaldary men turǵyndar qatysty.
Taldy aýyldyq okrýginiń ákimi Nurlan Abjanov bul bastamanyń aýyl jastary úshin mańyzy zor ekenin atap ótti.
– Osydan eki-úsh ai buryn aýyldyń ýchaskelik politsiia inspektory Muhamedqali Sadýaqasov jastardy sportqa baýlyp, olardyń talabyn ushtaityn zal qajet ekenin aityp, usynys bildirdi. Biz bul bastamany qoldadyq. Búgin sol jumystyń nátijesinde sport zalyn ashyp otyrmyz. Bul – politsiia tarapynan balalardyń bolashaǵyna kórsetilgen úlken qoldaý. Osy bastamany júzege asyrýǵa atsalysqan politsiia bóliminiń basshylyǵyna jáne Politsiia departamentine alǵysymdy bildiremin, – dedi aýyl ákimi.
Qyzmet babynda júrip, talai bairaqty básekede top jarǵan tártip saqshysynyń endigi maqsaty – ózi ashqan sport zalynda jattyqqan ár balanyń biikten kórinýi.
Al jańa zaldyń ashylýyna kýá bolǵan aýyl jastarynyń júzinen qýanysh pen úmit baiqaldy.
– Aýylymyzǵa Muhamedqali aǵamyz qyzmet babymen aýysyp kelgeli beri Taldy ishimdiksiz aýyl atandy. Búgin jastarǵa arnalǵan sport zaldyń ashylyp jatqanyna da qýanyp otyrmyz. Osyndai bastamamen aýylymyzǵa eńbek etetin azamattar kóp bolsa eken, – deidi aýyl turǵyny Aidar Qamiev.
Týǵan jerine qyzmet etý – elge qyzmet etýdiń eń biik úlgisi. Al qoǵamdyq tártipti qamtamasyz etýdi jastardyń tárbiesimen ushtastyrǵan Muhamedqali Sadýaqasov úshin politseilik mindet pen azamattyq paryzdyń túiiser tusy da osy.
