Prezident Qasym-Jomart Toqaevtyń AQSh-qa sapary osy aptanyń eń kóp talqylanǵan halyqaralyq oqiǵalarynyń biri bolyp, jetekshi álemdik buqaralyq aqparat quraldarynyń keń nazaryn aýdartty, dep habarlaidy Dalanews.kz.
Japoniianyń jetekshi aqparat agenttigi KyodoNews Toqaevtyń sapary C5+1 formatyndaǵy sammittiń keńeitilgen aýqymda ótkenin atap ótti. Agenttik Vashingtonnyń Ortalyq Aziia elderimen yntymaqtastyqty nyǵaitýǵa baǵyttalǵan ósip kele jatqan nazaryn erekshe atap kórsetti. Avtorlardyń pikirinshe, Qazaqstan AQSh-tyń mańyzdy seriktesi árióńirlik diplomatiianyń negizgi býyny retinde óz ustanymyn nyǵaityp keledi.
Financial Times basylymy sapardyń ónerkásiptik jáne tehnologiialyq kún tártibine basymdyq berdi. Basylymnyń jazýynsha, Qazaqstan – ýran óndirisi boiynsha álemdegi jetekshi memleket, sondai-aq Vashingtonda strategiialyq mańyzdy mineraldar salasyndaǵy yntymaqtastyq týraly Memorandýmǵa jáne quny 2 mlrd AQSh dollaryna deiin baǵalanǵan jasandy intellektke arnalǵan chipterdi jetkizý jónindegi Nvidia kompaniiasymen kelisimge qol qoiylǵanyn habarlady.
Sapardyń mańyzdy nátijeleriniń biri – Qazaqstannyń Avraam kelisimderine qosylatyny týraly málimdeme boldy. Bul bastama Izrailmen qarym-qatynasty qalypqa keltirýge baǵyttalǵan halyqaralyq yntymaqtastyqtyń bir bóligi bolyp tabylady.
CNN telearnasy bul sheshimdi tarihi dep atap, Donald Tramptyń sózin keltirdi:
«Men Izrail Premer-ministri Biniamin Netaniahýmen jáne Qazaqstan Prezidenti Qasym-Jomart Toqaevpen óte jaqsy áńgimelestim. Meniń ekinshi prezidenttik merzimim kezinde Avraam kelisimderine qosylǵan alǵashqy el – Qazaqstan boldy. Bul halyqaralyq seriktestiktiń jańa kezeńiniń bastaýy», — dedi Tramp.
The Washington Post basylymy Qazaqstannyń bulsheshimin «negizinen simvoldyq mańyzǵa ie» dep baǵalap, Astana men Tel-Aviv arasyndaǵy 30 jyldan astam ýaqytqa sozylǵan diplomatiialyq qatynastardy eske saldy.
Axios portaly bul qadamnyń «Qazaqstannyń musylman álemi men Batys arasyndaǵy kópir retindegi rólin kúsheitip, ekonomikalyq jáne gýmanitarlyq yntymaqtastyqtyń jańa múmkindikterin ashatynyn» atap ótti.
The New York Times sarapshylarynyń pikirinshe, Toqaevtyń bul sapary búkil Ortalyq Aziia óńiri úshin mańyzdy oqiǵaǵa ainalyp, Qazaqstannyń diplomatiialyq yqpalynyń artyp kele jatqanyn jáne onyń AQSh úshin strategiialyq seriktes retindegi mártebesin rastady.
The Straits Times basylymy kelissózderdegi negizgi taqyryptardyń biri energetikalyq qaýipsizdik bolǵanyn habarlady. AQSh tarapy Qazaqstannan ýran men ózge de strategiialyq mańyzdy mineraldardy jetkizýdi keńeitýge múddelilik tanytqan.
Reuters halyqaralyq agenttigi Prezident Toqaevpen Prezident Tramptyń Aq úidegi kezdesýin syndarly jáne iskerlik ahýalda ótti dep sipattap, kelissózderdiń saýda, energetika jáne tehnologiialar salalaryn qamtyǵanyn jetkizdi.
Osylaisha, Prezident Toqaevtyń Vashingtonǵa sapary Qazaqstannyń kópvektorly diplomatiiasynyń simvoly ǵana emes, sonymen qatar jahandyq jetekshi seriktesterdiń birimen strategiialyq yntymaqtastyqty nyǵaitýǵa baǵyttalǵan naqty qadam boldy.
