"Cizdiń esigińiz jabyq...". Taijan ministrdiń sózin joqqa shyǵardy
"Qurmetti ministr myrza, siz ózińizdiń baiandamańyzda 1 qańtardan bastap ǵarysh monitoringi respýblika boiynsha istep tur dedińiz. Ókinishke qarai, bul sózińiz shyndyqqa janaspaidy. Óitkeni sizdiń sheshimińizben jeltoqsan aiynda "ISJ" ("aýyl sharýashylyǵy janýarlaryn birdeilendirý" - Sputnik) degen bazany jaýyp tastady. Búgin, úsh ai boldy, birinshi toqsan da aiaqtalaiyn dep qaldy, kosmomonitoring "soqyr", jumys istemeidi", - dedi Taijan jer komissiiasynyń alǵashqy otyrysynda.
Taijan "ISJ" bazasyn ashý qajettigin jetkizdi. Sebebi bul – memlekettik aqparat. Ondai baza ashyq bolýy qajet.
Al aýyl sharýashylyǵy ministri Saparhan Omarov aqparat alǵysy keletin adam ministrlikke kelsin dedi.
"Eger biz aqparatty ashyq bermegen bolsaq, onda byltyrǵy kosmomonitoringti qalai ótkizdik? Bul – bir. Ekinshiden, kosmomonitoringke kerek aqparattyń barlyǵyn berip jatyrmyz. Biraq sol kosmomonitoringti júrgizip jatqan qoldaý júiesine ne kerek ekeni belgisiz. Bir aqparat suraidy, ekinshi aqparat suraidy, kei kezde bir-birine qaishy keledi. Kelsin bizge, bizdiń esigimiz ashyq. Qandai aqparat kerek, barlyǵyn beremiz", - dep jaýap berdi Omarov.
Biraq Muhtar Taijan ondai jaýapqa qanaǵattanǵan joq. Onyń aitýynsha, ministrdiń esigi ashyq emes, jabyq bolyp tur.
"Keshirim ótinemin, ministr myrza, sizdiń esigińiz, kerisinshe, jabyq qoi. Iá, byltyr kosmomonitoring jyl boiy jumys istedi. Iá, milliondaǵan jerler qaitaryldy. Ol ras. Biraq 15 jeltoqsanda bul aqparat jabyldy. Osy máseleni jinalyp shesheiik. Óitkeni kosmomonitoring úsh ai boiy istemei tur. Jap-jaqsy istep turǵan júieni ne sebepti jaýyp tastadyńyzdar? Men kezdesýge daiynmyn", - dedi Taijan.
Aita keteiik, ótken aptada premer-ministr Asqar Mamin "Jer reformasy boiynsha komissiia qurý týraly" ókimge qol qoiǵan bolatyn. Qujatta komissiianyń jalpy erejeleri, mindetteri, komissiia jumysyn uiymdastyrý jáne onyń tártibi kórsetilgen. Komissiianyń quramy da jariialandy.
