"قۇرمەتتى مينيستر مىرزا، ءسىز ءوزىڭىزدىڭ بايانداماڭىزدا 1 قاڭتاردان باستاپ عارىش مونيتورينگى رەسپۋبليكا بويىنشا ىستەپ تۇر دەدىڭىز. وكىنىشكە قاراي، بۇل ءسوزىڭىز شىندىققا جاناسپايدى. ويتكەنى ءسىزدىڭ شەشىمىڭىزبەن جەلتوقسان ايىندا "يسج" ("اۋىل شارۋاشىلىعى جانۋارلارىن بىردەيلەندىرۋ" - Sputnik) دەگەن بازانى جاۋىپ تاستادى. بۇگىن، ءۇش اي بولدى، ءبىرىنشى توقسان دا اياقتالايىن دەپ قالدى، كوسمومونيتورينگ "سوقىر"، جۇمىس ىستەمەيدى"، - دەدى تايجان جەر كوميسسياسىنىڭ العاشقى وتىرىسىندا.
تايجان "يسج" بازاسىن اشۋ قاجەتتىگىن جەتكىزدى. سەبەبى بۇل – مەملەكەتتىك اقپارات. ونداي بازا اشىق بولۋى قاجەت.
ال اۋىل شارۋاشىلىعى ءمينيسترى ساپارحان وماروۆ اقپارات العىسى كەلەتىن ادام مينيسترلىككە كەلسىن دەدى.
"ەگەر ءبىز اقپاراتتى اشىق بەرمەگەن بولساق، وندا بىلتىرعى كوسمومونيتورينگتى قالاي وتكىزدىك؟ بۇل – ءبىر. ەكىنشىدەن، كوسمومونيتورينگكە كەرەك اقپاراتتىڭ بارلىعىن بەرىپ جاتىرمىز. ءبىراق سول كوسمومونيتورينگتى جۇرگىزىپ جاتقان قولداۋ جۇيەسىنە نە كەرەك ەكەنى بەلگىسىز. ءبىر اقپارات سۇرايدى، ەكىنشى اقپارات سۇرايدى، كەي كەزدە بىر-بىرىنە قايشى كەلەدى. كەلسىن بىزگە، ءبىزدىڭ ەسىگىمىز اشىق. قانداي اقپارات كەرەك، بارلىعىن بەرەمىز"، - دەپ جاۋاپ بەردى وماروۆ.
ءبىراق مۇحتار تايجان ونداي جاۋاپقا قاناعاتتانعان جوق. ونىڭ ايتۋىنشا، ءمينيستردىڭ ەسىگى اشىق ەمەس، جابىق بولىپ تۇر.
"كەشىرىم وتىنەمىن، مينيستر مىرزا، ءسىزدىڭ ەسىگىڭىز، كەرىسىنشە، جابىق قوي. ءيا، بىلتىر كوسمومونيتورينگ جىل بويى جۇمىس ىستەدى. ءيا، ميلليونداعان جەرلەر قايتارىلدى. ول راس. ءبىراق 15 جەلتوقساندا بۇل اقپارات جابىلدى. وسى ماسەلەنى جينالىپ شەشەيىك. ويتكەنى كوسمومونيتورينگ ءۇش اي بويى ىستەمەي تۇر. جاپ-جاقسى ىستەپ تۇرعان جۇيەنى نە سەبەپتى جاۋىپ تاستادىڭىزدار؟ مەن كەزدەسۋگە دايىنمىن"، - دەدى تايجان.
ايتا كەتەيىك، وتكەن اپتادا پرەمەر-مينيستر اسقار مامين "جەر رەفورماسى بويىنشا كوميسسيا قۇرۋ تۋرالى" وكىمگە قول قويعان بولاتىن. قۇجاتتا كوميسسيانىڭ جالپى ەرەجەلەرى، مىندەتتەرى، كوميسسيا جۇمىسىن ۇيىمداستىرۋ جانە ونىڭ ءتارتىبى كورسەتىلگەن. كوميسسيانىڭ قۇرامى دا جاريالاندى.
