Jýrnalist Aqyrys Seiitqazy Olimpiada chempiony, Qaraǵandy oblystyq dene shynyqtyrý jáne sport basqarmasynyń basshysy Serik Sápievtiń soqqyǵa jyǵylýyna qatysty pikir bildirip, bul oqiǵa memlekettik qyzmet júiesindegi kúrdeli túitkilderdiń betin ashqanyn málimdedi, dep habarlaidy Dalanews.kz.
Onyń aitýynsha, orynbasary tarapynan jasalǵan álimjettik jeke janjal emes, basqarý júiesindegi olqylyqtardyń saldary bolýy múmkin.
Aqyrys Seiitqazy bul jaǵdaiǵa oblystyq deńgeidegi basshylyqtyń jaýapkershiligi bar ekenin aitady. Jýrnalistiń pikirinshe, mundai áreketke barǵan adam ózdiginen sheshim qabyldamaidy.
«Orynbasarynyń dál osylai basynýyna oblys basshylary múmkindik berip otyr. Óitkeni artynda tireýi joq adam basshyǵa, onyń ústine Olimpiada chempionyna shappaidy», – dedi ol.
Onyń sózinshe, bul jaǵdai memlekettik qyzmettegi jaýapkershilik pen baqylaýdyń álsiregenin ańǵartady.
Jýrnalist oqiǵanyń taǵy bir qyryn da atap ótti. Ol kúdikke ilingen Dáýren Esimhanovtyń kásibi sportshy ekenin eske saldy.
«Esimhanov – samboshy, salmaǵy da aýyr. Al Serik Sápievti kópshilik birtoǵa, qaq-soqqa kóp joq adam retinde biledi», – dedi Aqyrys Seiitqazy.
Onyń aitýynsha, salmaq aiyrmashylyǵynyń ózi janjaldyń qalai órbigenin kórsetip otyr.
«Salmaǵy eki ese aýyr adamnyń Serikti sabap, kiimin jyrtyp tastaǵany da sodan shyǵar», – dep jazdy ol.
Jýrnalist bul jaǵdaidy tek kúsh qoldaný emes, basqarý tártibiniń buzylýy retinde baǵalaidy. Onyń pikirinshe, bul Sápievke baǵynyshty qyzmetkerlerdiń moiynsunbaitynyn kórsetedi.
«Al basshyǵa baǵynbaý úshin, taǵy da aitamyn, orynbasarǵa basqa bireýler jel berip otyrýy múmkin», – deidi ol.
Aqyrys Seiitqazy ózine jetken derektermen de bólisti. Onyń aitýynsha, kúdikke ilingen orynbasar basshysynyń kelisiminsiz qujattarǵa qol qoiǵan bolýy múmkin.
Jýrnalist máseleniń mańyzdylyǵyn eskere otyryp, jaǵdaidy memleket basshysy deńgeiinde qarastyrý qajet dep sanaidy.
«Menińshe, bul máseleni prezident Toqaev tikelei baqylaýǵa alýy kerek», – dedi ol.
Aqyrys Seiitqazy Qazaqstanda Olimpiada chempiondarynyń sany kóp emes ekenin atap ótti.
«Sápiev siiaqty elimizdiń abyroiyn arqalap júrgen azamatty kim kóringenniń basyna berý durys emes», – dep jazdy jýrnalist.
Onyń pikirinshe, sportta eldiń atyn álemge tanytqan chempiondarǵa memleket tarapynan erekshe qorǵaý qajet.
«Chempiondardy erekshe qorǵaýǵa alý kerek!» – dep túiindedi ol.
Eske salaiyq, buǵan deiin Serik Sápiev soqqyǵa jyǵylyp, orynbasary tergeýge alynǵanyn habarlaǵan edik.
