Májilis depýtattary Qazaqstanda jasandy intellektti qoldanýdy retteitin zańdy qabyldady. Qujatta adam quqyqtaryna basymdyq berý, ashyqtyq pen ulttyq qundylyqtardy saqtaý basty nazarǵa alynǵan. Zań jasandy intellekt júielerine qupiia aqparattyń taralýyna shekteý qoiady, emotsiialardy taldaýǵa tyiym salady jáne dipfeikterdi mindetti túrde belgileýdi engizedi, dep habarlaidy Dalanews.kz.
ChatGPT degenimiz ne?
ChatGPT – bul jasandy intellekt tehnologiiasyna negizdelgen, adammen tabiǵi tilde sóilese alatyn aqyldy tildik model. Ony OpenAI kompaniiasy jasap shyǵarǵan. ChatGpt búginde álemniń kóptegen elderinde keńinen qoldanylady. Eń belsendi paidalanatyn elder qatarynda: AQSh , Kanada, Ulybritaniia , Germaniia, Frantsiia, Niderlandy, Italiia, Úndistan, jáne t.b.
ChatGPT resmi túrde qoldanylmaityn nemese shektelgen elder:
Qytai- OpenAI ónimderi resmi qoljetimsiz. Biraq jergilikti balamalary bar.
Soltústik Koreia- tolyq tyiym salynǵan.
Iran, Siriia, Kýba- halyqaralyq sanktsiialar men internet tsenzýrasyna bailanysty qoljetimsiz.
Májilis depýtaty Ekaterina Smyshliaeva jasandy intellekt adamnyń quqyqtaryn birinshi orynǵa qoiýy tiis ekenin málimdedi. Alaida jasandy intellekt quqyq sýbektisi retinde tanylmaidy, sondyqtan onyń kómegine júgingender barlyq sheshimder úshin jaýapkershilikti ózderi kóteredi.
«Zań jobasynda jasandy intellektti qoldanýdyń negizgi etikalyq qaǵidattary bekitilgen. Olardyń qatarynda- adam quqyqtarynyń basymdyǵy, eńbek qaýipsizdigi jáne ashyqtyq bar»,- dedi ol.
Dipfeiktermen kúresý maqsatynda zań sintetikalyq kontentti «adamǵa túsinikti túrde» arnaiy belgileýdi mindetteidi. Sondai-aq, jasandy intellekt qoldanylatyn qyzmetter kórsetilgende nemese taýarlar satylǵanda, tutynýshylar bul týraly aldyn ala habardar etilýi tiis.
Onyń aitýynsha, qazirgi kezde eń ózekti máselelerdiń biri- qyzmettik jáne qupiia aqparattyń neirojúieler arqyly syrtqa taralýy. Osyǵan bailanysty,ashyq júielerdi qoldanýǵa aqparattyq qaýipsizdik talaptary turǵysynan qatań shekteýler qoiylatyn bolady- dep atap ótti.
Emotsiialardy taldaýǵa tyiym
Zańǵa sáikes, árbir adam jasandy intellekt qalai jumys isteitinin bilýge, ári ony paidalanýdan bas tartýǵa quqyly bolady.
«Adamnyń minez-qulqyn basqarý, emotsiialaryn paidalaný, áleýmettik baǵalaý júrgizý jáne jeke derekterdi ruqsatsyz jinaý syndy fýnktsiialardy bar júielerge qatań tyiym salynady»- dedi Ekaterina Smyshliaeva.
Depýtattyń aitýynsha, el ishinde- iaǵni syrtqy júielerge qosylmai, jabyq kontýrda jumys isteitin jasandy intellekt júielerine erekshe nazar aýdarý qajet. Sebebi búginde neirojúieler balalar men jastar arasynda asa tanymal bolyp barady. Olar úshin chat- bottar keńesshige, dosqa, tipti pikirles serikke ainalyp úlgergen.
«Búgingi tańda bul júieler balalar men jasóspirimder arasynda óte tanymal. Olarmen sóilesetin chattar jastarǵa keńes berip, syrlas dos, tipti rýhani jolserikke ainalýda.Alaida, bul modelder jahandyq- kóbine kommertsiialyq jáne saiasi baǵyttaǵy – derekter negizinde oqytylǵan.Olardyń ishinde bizdiń ulttyq qundylyqtarymyz ben dúnietanymdyq baǵdarymyz joq. Bul – eldiń ulttyq qaýipsizdigine tikelei qatysy bar másele»,- dep atap ótti depýtat.
Avtorlyq quqyq jáne jasandy intellekt
Jańa zańǵa sáikes, adamnyń qatysýynsyz, tolyqtai jasandy intellekt jasaǵan týyndylar avtorlyq quqyqpen qorǵalmaidy. Iaǵni, eger adam óz shyǵarmashylyq eńbegin qospasa, mundai kontentke quqyqtyq ielik te paida bolmaidy.
Sonymen qatar, paidalanýshylardyń shyǵarmashylyq sipattaǵy suranystary, mysaly, jasandy intellekte beriletin biregei tapsyrma formalary (iaǵni «prompttar») avtorlyq qorǵaýǵa ie bolýy múmkin.
«Jasandy intellekt modelin úiretý úshin qandai da bir shyǵarmalardy paidalaný- tek avtor nemese quqyq ielenýshi mashinalyq oqýǵa tyiym salmaǵan jaǵdaida ǵana ruqsat etiledi»- dedi depýtat.
