Kesh ataýy aityp turǵandai, sharanyń maqsaty – óneri men ómiri jarasqan ánshi, ónerde ózindik orny bar Sáken Maiǵazievti jastarǵa úlgi etý, shyǵarmashylyǵymen tanystyrý, tanymal ánshimen jastardy júzdestirý.
Oqý oryn jastary men oqytýshylary qatysqan keshte ine shanshar jer bolmady. Arýlar ordasynyń qyzdary zor qoshemetpen, erekshe iltipatpen qarsy aldy. Analar merekesimen, kóktem merekesimen quttyqtai kelgen ýniversitettiń qadirli qonaǵy aldymen oqý orynnyń biregei tarihi- etnografiialyq «Aqtumar» murajaiyn tamashalap, estelik kitapqa tilegin jazyp, qoltańbasyn qaldyrdy.
Búkpesiz áńgime, riiasyz júzdesý bolǵan keshte aitary bar jasqa jetken, qashanda «Bas kespek bolsa da, til kespek joq» dep, shyndyqty ǵana aitatyn Sáken Maiǵaziev tek qana qyzdar bilim alatyn qarakóz qaryndastaryna óz bilgen, túigenderimen, ómirden alǵan sabaqtarymen, súiikti ustazdary men balalary, jubaiymen tanystyǵy týraly, balalyq shaǵymen, stýdenttik kezimen, ómir jáne óner jolyndaǵy qyzyqty oqiǵalarǵa toly áserli áńgimelerimen bólisip, elimizdiń ult tárbieshileri, ustaz, bolashaq ana, bolashaq jar bolatyn arý qyzdarǵa aǵalyq aqyl-keńesterin aitty. Sonymen qatar, jastardyń qyzyqtyrǵan tolassyz saýaldaryna úsh saǵat boiy jalyqpastan tushymdy jaýap berdi.
Kezdesý barysynda óneri men ómiri jarasqan ánshi, talaidy tamsandyrǵan erekshe talant iesi óz repertýaryndaǵy «Asyl ana», «Jylama arý», «Arailym» jáne t.b. arýlar men analarǵa arnalǵan ánderin jandy tabiǵi daýysta oryndap, 8 naýryz – Arýlar merekesine orai ánnen shashý shashyp, mereke aldynda ónerin qurmettep kelgen barsha qaýymǵa kóterińki kóńil syilady.
Kesh sońynda alǵan áserimen bólisken belgili ánshi Sáken Maiǵaziev:
– Búgin jyly shyraily, jylýlyqqa toly kezdesý boldy. Alǵan áserim keremet. Jii-jii kelip turýdy Alla násip etsin. Eki ai buryn aityp edi, mine, búgin kóktemniń alǵashqy kúnine sáti keldi. Qyzdardyń mazmundy da, oily suraqtaryna riza boldym. Qasietti qara shańyraqqa ainalǵan Arýlar ordasyna úlken tabys tileimin. Qyzdarymyz ata-ananyń, ustazdarynyń senimin aqtap, ibaly, inabatty, iman júzdi, «Qazaq qyzy» degen atqa laiyq bolsa eken. Bolashaq jar, bolashaq ana bolatyn ár arýǵa áiel baqytyn tileimin. Adal jar tabyńyzdar, aiaýly ana atanyńyzdar, baqytty da súiikti bolyńyzdar! – dep Parasat mektebinde oqityn qarakóz qaryndastaryna aq júrekten shyqqan tilegin bildirdi.
Atap óte keteiik, kezdesý barysynda oqý orynnyń qurmetti qonaǵy Sáken Maiǵaziev Qyzdar ýniversitetiniń «Qurmet belgisi» medalimen marapattaldy. Ony Sanat Ainaqulov tabys etip, qadirli qonaqqa altyn ýaqytyn bólip kelgeni úshin alǵysyn bildirdi.
– Meniń súiikti ánshim, qazaq estradasynyń jaryq juldyzy Sáken Maiǵazievpen kezdesý ótkenine óte qýanyshtymyn. Tek teledidardan kóretin ánshimmen júzdestirgeni úshin ustazdaryma, uiymdastyrýshylarǵa aitar alǵysym sheksiz. Men Sákenniń, «MýzArt» tobynyń ánderin súiip tyńdaimyn. Sákenniń tyńdarmanymyn, jankúierimin. Onyń ómiri men shyǵarmashylyǵymen jaqsy tanyspyn. Sáken Maiǵaziev – ónerimen de, ómirimen de jastarǵa úlgi jan. Oǵan búgin aitqan taǵylymdy oilary, ǵibratty áńgimeleri dálel bola alady. Aldaǵy ýaqytta Meirambek Bespaevpen kezdessek dep armandaimyz, – deidi oqý orynnyń 3-kýrs stýdenti Sábina Qoishanova.
Zeinolla Abajanov
