«Bıznestiń jol kartasy – 2020» baǵdarlamasyna júrgizilgen memlekettik aýdıt nátıjesinde 19,5 mlrd teńgege qarjylyq zańbuzýshylyq anyqtaldy. Bul týraly QR Respýblıkalyq búdjettiń atqarylýyn baqylaý jónindegi Esep komıtetiniń múshesi Aıgúl Muhametkárim málim etti, dep habarlaıdy Baq.kz tilshisi.

– Memlekettik aýdıt qamtyǵan 126,7 mlrd teńgeniń 19,5 mlrd teńgesine qarjylyq zańbuzýshylyq anyqtaldy. 62,8 mlrd teńge tıimsiz paıdalanylǵan, – deıdi A.Muhametkárim.

Onyń aıtýynsha, jergilikti jerlerden ótinish túspese de, Ulttyq ekonomıka mınıstrligi Ulttyq qordan taǵy da 7,2 mlrd teńge aýdarǵan. Qyrkúıektegi jaǵdaı boıynsha ol aqshanyń 6,3 mlrd. teńgesi qaldy. Osydan baryp bıyl bul qarjy taǵy ıgerilmeı qalady degen boljam bar.

– Aýdıt nátıjesinde baǵdarlamanyń is-sharalary sapasyz josparlanatyny anyqtaldy. Al birneshe ret ózgeristerdi engizýdiń nátıjesinde tıisti esep-qısapsyz respýblıkalyq búdjetten 14,2 mlrd. teńge maqsatty transfert bólindi. Naqty qajettilik bolmasa da, Ulttyq qordan baǵdarlamanyń úılestirýshisi "Damý" qoryna qyrýar qarjy aýdarylady. Osynyń nátıjesinde 2010 jyldan bastap qorda jaı jatqan aqshanyń úlken kólemi jınaldy. Bıyl ol qarjynyń kólemi 25,3 mlrd. teńgeni qurady. Ol aqshadan túsken bankterdiń syıaqysy 1 mlrd. teńgeden asty, – dedi komıtet múshesi.