QR Qarjy ministrligi Memlekettik kirister komiteti biýdjetke tólemder jasaý kezinde jańa talaptar engizilgenin habarlady. Sondai-aq elimizde salyqtardy tóleý merzimi 10 sáýirde aiaqtalady, dep habarlaidy Dalanews.kz.
ISO 20022 halyqaralyq standartty tólem habarlamalary formatynyń engizilýine bailanysty Qazaqstan Respýblikasynyń aýmaǵynda qolma-qol aqshasyz tólemder men aqsha aýdarymdaryn júzege asyrý qaǵidalarynda ózgerister boldy, sondai-aq biýdjetke tólemder jasaý úshin jańa tólem tapsyrmasynyń formasy bekitildi.
Negizgi ózgeris – jańa "Naqty tóleýshi" grafasy.
Salyqtar men tólemderdiń biýdjettiń durys esepke alynýy úshin ony toltyrý tártibine nazar aýdaramyz:
- Zańdy tulǵalar ózderiniń qurylymdyq bólimsheleri úshin salyqtar men áleýmettik tólemderdi tólegen kezde jiyntyq tólem tapsyrmasynyń "Naqty tóleýshi" baǵanynda tiisti qurylymdyq bólimsheniń ataýy men BSN kórsetý qajet.
- Sot oryndaýshylary boryshkerlerdiń mindettemeleri boiynsha tólemderdi aýdarǵan kezde tólem tapsyrmasynyń "Naqty tóleýshi" baǵanynda boryshkerdiń TAÁ jáne JSN kórsetý qajet.
"Naqty tóleýshi" grafasynda málimetterdiń durys kórsetilmeýi qarajattyń durys esepke alynbaýyna jáne qaryzdyń paida bolýyna ákelýi múmkin.
Aita ketsek, Qazaqstanda 2024 jylǵa arnalǵan deklaratsiia boiynsha salyqtardy tóleý merzimi 2025 jyldyń 10 sáýirinde aiaqtalady:
- 2024 jylǵa arnalǵan deklaratsiia boiynsha korporativtik tabys salyǵyn (KTS) sońǵy eseppen tóleý;
- rezident emes zańdy tulǵanyń kiristerinen tólenetin KTS (tabysty tóleý kózi boiynsha);
- 2024 jylǵa arnalǵan deklaratsiia negizinde tólem kózi boiynsha salyq salynbaityn jeke tulǵalardyń kiristerinen jeke tabys salyǵynyń (JTS) sońǵy eseptik tólemi;
- 2024 jyl úshin tarihi shyǵyndardy óteý boiynsha tólem;
- 2024 jylǵy deklaratsiia negizinde artyq paida salyǵy;
- 2024 jylǵa arnalǵan jer qoinaýyn paidalanýdyń balamaly salyǵy;
- 2024 jyl úshin kólik quraldaryna salynatyn salyq;
- 2024 jylǵa arnalǵan jer salyǵy boiynsha sońǵy esep;
- 2024 jylǵa arnalǵan múlik salyǵy boiynsha sońǵy esep;
- 2024 jyldyń 1 qazanynan 31 jeltoqsany aralyǵyndaǵy kezeńge arnalǵan biryńǵai jer salyǵy jáne jer ústi sý kózderin paidalanǵany úshin tólem.
