2025 jylǵy Ulttyq banktiń alǵashqy málimdemesi jariialandy. Retteýshi organnyń bul jolǵy málimdemesi sońǵy aida belgili bir turaqsyzdyqqa ushyraǵan valiýta naryǵyna bailanysty, dep jazady Dalanews.kz.
Ulttyq banktiń málimetinshe, jeltoqsan aiynyń qorytyndysy boiynsha teńge baǵamy 1 AQSh dollary úshin 525,10 teńgege deiin 2,5%-ǵa álsiredi. Qazaqstan qor birjasyndaǵy saýda-sattyqtyń ortasha kúndik kólemi bir aida 262 mln-nan 254 mln AQSh dollaryna deiin tómendedi. Saýda-sattyqtyń jalpy kólemi 5,3 mlrd AQSh dollaryn qurady.
"Ulttyq qordan respýblikalyq biýdjetke transfertterdi qamtamasyz etý úshin jeltoqsanda 900 mln AQSh dollaryna valiýta satyldy. Ulttyq qordan satý úlesi jalpy saýda-sattyq kóleminiń 17%-yn nemese kúnine shamamen 43 mln AQSh dollaryn qurady. Ulttyq bank Ulttyq qordyń qarajatymen operatsiialar júrgizý kezinde naryqtyq beitarap qaǵidatyn saqtaidy, bul shetel valiýtasyn udaiy jáne birkelki satýdy bildiredi", delingen 5 qańtarda taratylǵan Ulttyq banktiń baspasóz qyzmeti habarlamasynda.
Respýblikalyq biýdjetke transfert bólýge Úkimettiń aldyn ala boljamdy ótinimderi boiynsha 2025 jylǵy qańtarda Ulttyq Bank Ulttyq qordan 750 mln AQSh dollarynan 850 mln AQSh dollaryna deiingi mólsherde valiýta satylady dep kútedi.
"BJZQ-da valiýtalyq aktivter úlesi 2024 jyldyń sońynda 40%-dan sál joǵary boldy. Ulttyq Bank jeltoqsanda zeinetaqy aktivteriniń investitsiialyq portfeline AQSh dollaryn satyp alǵan joq. 2025 jylǵy qańtarda BJZQ-qa valiýta satyp alý josparlanbady. Ishki valiýta naryǵynda shekteýli usynys kezinde ekonomikalyq agentter tarapynan shetel valiýtasyna joǵary suranys saqtaldy", - deidi retteýshi organ.
Sondai-aq Ulttyq bank turaqsyzdyq týdyratyn aýytqýlardyń aldyn alyp, teńge baǵamynyń shamadan tys qubylmalylyǵyn retteý maqsatynda jáne belgili bir kezeńderde shetel valiýtasynyń usynysyn qamtamasyz etý úshin ózderiniń jeltoqsanda valiýtalyq interventsiia júrgizgenin naqtylaidy. Sonymen aidyń qorytyndysy boiynsha valiýta satý kólemi 307,6 mln AQSh dollaryn qurady.
"Ulttyq bank transparenttilik qaǵidaty aiasynda valiýta naryǵynda júrgiziletin operatsiialar týraly tolyq aqparatty ashyp kórsetýdi jalǵastyrady. Qysqamerzimdi perspektivada teńgeniń dinamikasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaiasi jaǵdaidyń ózgerýine bailanysty bolady. Ulttyq Bank teńgerimsizdiktiń jinaqtalýyn boldyrmaityn jáne altyn-valiýta rezervteriniń saqtalýyn qamtamasyz etetin ikemdi baǵam belgileý rejimin ustana beredi", delingen habarlamada.
Buǵan deiin elimizde valiýta operatsiiasyn júrgizý erejeleri ózgeretinin jazǵanbyz. Oǵan sáikes, valiýta satyp alý kezinde zańdy tulǵalar, rezidentter, eger bir jumys kúni ishinde teńgemen satyp alynǵan shetel valiýtasynyń jalpy somasy 50 myń AQSh dollarynan assa, satyp alý maqsatyn kórsetýi jáne bankke valiýtalyq kelisimshartty usynýy kerek. Sonymen qatar paidalanylmaǵan valiýtany keri satý týraly nusqaý berilýi tiis. Eger jalpy satyp alý somasy 50 myń AQSh dollarynan asatyn bolsa, buryn jasalǵan ótinimder eskerile otyryp, barlyq ótinimderdiń jalpy somasy esepteledi. Qujattardy jáne keri satý nusqaýyn usynbai, klient bir operatsiialyq kúnde bank arqyly kez kelgen maqsatqa arnalǵan 50 myń AQSh dollaryna deiingi valiýtany satyp ala alady.
