2025 جىلعى ۇلتتىق بانكتىڭ العاشقى مالىمدەمەسى جاريالاندى. رەتتەۋشى ورگاننىڭ بۇل جولعى مالىمدەمەسى سوڭعى ايدا بەلگىلى ءبىر تۇراقسىزدىققا ۇشىراعان ۆاليۋتا نارىعىنا بايلانىستى، دەپ جازادى Dalanews.kz.
ۇلتتىق بانكتىڭ مالىمەتىنشە، جەلتوقسان ايىنىڭ قورىتىندىسى بويىنشا تەڭگە باعامى 1 اقش دوللارى ءۇشىن 525،10 تەڭگەگە دەيىن 2،5%-عا السىرەدى. قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى ءبىر ايدا 262 ملن-نان 254 ملن اقش دوللارىنا دەيىن تومەندەدى. ساۋدا-ساتتىقتىڭ جالپى كولەمى 5،3 ملرد اقش دوللارىن قۇرادى.
"ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن جەلتوقساندا 900 ملن اقش دوللارىنا ۆاليۋتا ساتىلدى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 17%-ىن نەمەسە كۇنىنە شامامەن 43 ملن اقش دوللارىن قۇرادى. ۇلتتىق بانك ۇلتتىق قوردىڭ قاراجاتىمەن وپەراسيالار جۇرگىزۋ كەزىندە نارىقتىق بەيتاراپ قاعيداتىن ساقتايدى، بۇل شەتەل ۆاليۋتاسىن ۇدايى جانە بىركەلكى ساتۋدى بىلدىرەدى"، دەلىنگەن 5 قاڭتاردا تاراتىلعان ۇلتتىق بانكتىڭ باسپا ءسوز قىزمەتى حابارلاماسىندا.
رەسپۋبليكالىق بيۋدجەتكە ترانسفەرت بولۋگە ۇكىمەتتىڭ الدىن الا بولجامدى وتىنىمدەرى بويىنشا 2025 جىلعى قاڭتاردا ۇلتتىق بانك ۇلتتىق قوردان 750 ملن اقش دوللارىنان 850 ملن اقش دوللارىنا دەيىنگى مولشەردە ۆاليۋتا ساتىلادى دەپ كۇتەدى.
"بجزق-دا ۆاليۋتالىق اكتيۆتەر ۇلەسى 2024 جىلدىڭ سوڭىندا 40%-دان ءسال جوعارى بولدى. ۇلتتىق بانك جەلتوقساندا زەينەتاقى اكتيۆتەرىنىڭ ينۆەستيسيالىق پورتفەلىنە اقش دوللارىن ساتىپ العان جوق. 2025 جىلعى قاڭتاردا بجزق-قا ۆاليۋتا ساتىپ الۋ جوسپارلانبادى. ىشكى ۆاليۋتا نارىعىندا شەكتەۋلى ۇسىنىس كەزىندە ەكونوميكالىق اگەنتتەر تاراپىنان شەتەل ۆاليۋتاسىنا جوعارى سۇرانىس ساقتالدى"، - دەيدى رەتتەۋشى ورگان.
سونداي-اق ۇلتتىق بانك تۇراقسىزدىق تۋدىراتىن اۋىتقۋلاردىڭ الدىن الىپ، تەڭگە باعامىنىڭ شامادان تىس قۇبىلمالىلىعىن رەتتەۋ ماقساتىندا جانە بەلگىلى ءبىر كەزەڭدەردە شەتەل ۆاليۋتاسىنىڭ ۇسىنىسىن قامتاماسىز ەتۋ ءۇشىن وزدەرىنىڭ جەلتوقساندا ۆاليۋتالىق ينتەرۆەنسيا جۇرگىزگەنىن ناقتىلايدى. سونىمەن ايدىڭ قورىتىندىسى بويىنشا ۆاليۋتا ساتۋ كولەمى 307،6 ملن اقش دوللارىن قۇرادى.
"ۇلتتىق بانك ترانسپارەنتتىلىك قاعيداتى اياسىندا ۆاليۋتا نارىعىندا جۇرگىزىلەتىن وپەراسيالار تۋرالى تولىق اقپاراتتى اشىپ كورسەتۋدى جالعاستىرادى. قىسقامەرزىمدى پەرسپەكتيۆادا تەڭگەنىڭ ديناميكاسى نارىققا قاتىسۋشىلاردىڭ كۇتۋلەرىنە، توقساندىق سالىق تولەمدەرىنە، الەمدىك نارىقتارداعى احۋالعا جانە گەوساياسي جاعدايدىڭ وزگەرۋىنە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانا بەرەدى"، دەلىنگەن حابارلامادا.
بۇعان دەيىن ەلىمىزدە ۆاليۋتا وپەراسياسىن جۇرگىزۋ ەرەجەلەرى وزگەرەتىنىن جازعانبىز. وعان سايكەس، ۆاليۋتا ساتىپ الۋ كەزىندە زاڭدى تۇلعالار، رەزيدەنتتەر، ەگەر ءبىر جۇمىس كۇنى ىشىندە تەڭگەمەن ساتىپ الىنعان شەتەل ۆاليۋتاسىنىڭ جالپى سوماسى 50 مىڭ اقش دوللارىنان اسسا، ساتىپ الۋ ماقساتىن كورسەتۋى جانە بانككە ۆاليۋتالىق كەلىسىمشارتتى ۇسىنۋى كەرەك. سونىمەن قاتار پايدالانىلماعان ۆاليۋتانى كەرى ساتۋ تۋرالى نۇسقاۋ بەرىلۋى ءتيىس. ەگەر جالپى ساتىپ الۋ سوماسى 50 مىڭ اقش دوللارىنان اساتىن بولسا، بۇرىن جاسالعان وتىنىمدەر ەسكەرىلە وتىرىپ، بارلىق وتىنىمدەردىڭ جالپى سوماسى ەسەپتەلەدى. قۇجاتتاردى جانە كەرى ساتۋ نۇسقاۋىن ۇسىنباي، كليەنت ءبىر وپەراسيالىق كۇندە بانك ارقىلى كەز كەلگەن ماقساتقا ارنالعان 50 مىڭ اقش دوللارىنا دەيىنگى ۆاليۋتانى ساتىپ الا الادى.
