Qýandyq Bishimbaevtyń burynǵy áieli Nazym Qaharman eks-ministrmen birge turǵan jyldar týraly ashyp aitty, - dep habarlaidy Dalanews.kz.
Ol Bishimbaevpen birge turǵan 14 jylyn biraýyz sózben aityp jetkize almaitynyn aitty.
«Qolynda granatasy bar maimylmen ómir súrgendei boldym. Qai kezde jarylyp ketetinin bilmeisiń. Tańerteń onyń súiikti jeidesindegi túimesin tigip bermegeniń úshin sóz estýiń múmkin. Osyndai nárseler úshin shý shyǵaryp, aiǵailap jiberýi múmkin edi. Keshke jumystan qandai kóńil-kúimen keletinin bilmeisiń. Kelgen kezde oǵan bir sát qarap turyp qalasyń. Keiin ajyrasqan kezde baqyt – óte qarapaiym nárseler ekenine kózim jetti», - deidi Nazym Qaharman «Ýmnye liýdi» arnasyna bergen suhbatynda.
Nazym Qaharmannyń sózinshe, olar bir shańyraq astynda ómir súrgen kezderde Bishimbaev kózine shóp salǵan kezder bolǵan.
«Áiel baqytyn sezbeitinimdi túsindim. Demek meniń taǵdyrym osy dep oiladym. Osyndai krest qoidym ózime. Alǵashqy sot protsesinen keiin, ony túrmege qamap tastaǵannan keiin qiyn sátte tastap ketý durys emes dep oiladym. Iá, baqytta bolmaǵan shyǵarmyn, biraq áiel adam retinde mindetim baryn túsindim. Izoliator da, sot ta óte qiyn kez boldy. Balalarymdy buryn da, qazir de ákesine qarsy qoiǵan emespin», - deidi Nazym.
Aita keteiik, Nazym Qaharman Qýandyq Bishimbaevpen 14 jyl nekede bolǵan. Olar 2020 jyly ajyrasyp ketken. Nazym Qaharman men Qýandyq Bishimbaevtyń úsh balasy bar.
Buǵan deiin Qýandyq Bishimbaevtyń burynǵy áieli Nazym Qaharman sot otyrysyna qatysty pikir bildirgen bolatyn. Sot otyrystarynyń birinde Bishimbaev Saltanat pen balalaryn alyp shetelge demalýǵa shyǵar kezde bolǵan jait týraly aityp bergen bolatyn. Qýandyq Bishimbaevtyń sózinshe, Saltanat shetelge shyǵar aldyndaǵy túnde sheteldik tólqujatyn joǵaltyp alǵan.
Osyǵan bailanysty Nazym Saltanatpen ne jaily sóileskenin kórsetken. Saltanat bul jaitqa qatysty Nazymnan birden keshirim suraǵan.
«Tólqujatymdy joǵaltyp alǵanym úshin keshirim suraimyn, úide kóship, arasynda streske túsip, bári qabattasyp ketti. Balalardyń maǵan kózqarasy jaqsy, ol sizdiń arqańyzda. Óte meiirimdi jáne tárbieli balalar. Bul sizdiń arqańyz dep bilemin jáne sizge qurmetpen qaraimyn. Eger qarsy bolmasańyz sizben tanyssam dep edim. Qarym-qatynasymyz jaqsy bolǵanyn qalaimyn», - dep jazǵan Saltanat.
Sondai-aq Nazym Qaharman «Qýandyq Bishimbaev manipýliator» degen pikirmen kelisken.
Sonymen qatar, áleýmettik jelide Qýandyq Bishimbaevtyń burynǵy áieli Nazym Qaharman da búgingi sot otyrysyna qatysty pikir bildirip, tek Baijanovqa emes, oǵan da qysym jasalyp jatqanyn jetkizdi.
"...Tipti sotta da búkil eldiń kózinshe oǵan (Baijanovqa - esk.) abiýzerlik qarym-qatynas jasap jatyr. Tek oǵan emes (ol sottalýshylar oryndyǵynda birge otyr), maǵan da qysym kórsetýge tyrysyp jatyr. Sondai qorqynyshty. Sot Baqytjandy odan alystatady dep úmittenemin", - dep jazdy Nazym.
