Azamattyq nekedegi áieli Saltanat Núkenovany óltirdi degen aiyppen eks-ministr Qýandyq Bishimbaev sottaldy. Bishimbaevty qorǵaǵan advokattardyń biri Erlan Ǵazymjanov alǵash ret sot úkimine qatysty pikir bildirdi, - dep habarlaidy Dalanews.kz.
"Apelliatsiiaǵa beremiz, úkimge shaǵymdanýǵa niettimiz. Qorǵaý tarapynyń pikirinshe, sýdia eleýli protsessýaldyq zańbuzýshylyqtarǵa jol berdi", - dedi ol Tengrinews.kz tilshisine bergen suhbatynda.
Ǵazymjanov Bishimbaevqa taǵaiyndalǵan 24 jylǵa bas bostandyǵynan aiyrý jazasy týraly da aitty.
"Qorǵaýshy tarap Bishimbaevty qinaý baby boiynsha aiǵaqtardyń joqtyǵyna bailanysty aqtap, adam óltirgeni úshin emes, abaisyzda adam ólimine ákep soqtyrǵan aýyr dene jaraqatyn keltirgeni úshin kináli dep taný kerek edi dep esepteidi.
Bul bap (Qylmystyq kodekstiń 106-baby, 3-bóligi) 8 jyldan 12 jylǵa deiin bas bostandyǵynan aiyrý jazasyn qarastyrady. Osylaisha, zań boiynsha Bishimbaev osy shekte jazalanýy kerek", - dep esepteidi advokat.
Advokat úkim jariialanǵannan keiin Bishimbaevqa tergeý izoliatoryna barǵanyn aitty.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- azaptaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
