Burynǵy ulttyq ekonomika ministri Qýandyq Bishimbaev sot zalynda Memleket basshysy Nursultan Nazarbaevtan keshirim surady, dep habarlaidy Baq.kz.
Eks-ministr sotta ózine taǵylǵan aiyptarǵa qatysty tek shyndyqty aitatynyn ári jibergen qateligi úshin halyqtan keshirim suraitynyn jetkizdi.
«Meniń bul iske qatysym joq. Muny bizdiń qoǵamǵa jáne eń mańyzdysy Qazaqstan prezidenti, ult kóshbasshysy Nursultan Nazarbaevqa jetkizgim keledi. Osyndai kásibi deńgeige jetýim sol kisiniń arqasy.
Prezidenttiń aldynda kináli ekenimdi sezemin. Senim artyp, jumysqa shaqyrǵan azamattar meni jarǵa jyqty.
Men sol úshin jaýap beremin. Olar meni jáne senimimdi paidalandy. Sol úshin men Elbasydan, halyqtan keshirim suraimyn. Osy jaǵdaiǵa qaramastan men árqashan prezidentke berilgen azamat bolamyn», - dedi eks-ministr sot zalynda.
Aita keteiik, 31 qazan kúni Astanada burynǵy ulttyq ekonomika ministri Qýandyq Bishimbaev jáne atalǵan iske qatysy bar dep kúdikke ilingen 22 azamatqa qatysty aldyn ala sot tergeýi bastaldy. Burynǵy ministrge Qylmystyq kodekstiń «Para alý» - 366-baby, 4-tarmaǵyna, sondai-aq «Senip tapsyrylǵan bóten múlikti iemdenip alý nemese talan-tarajǵa salý» - 189-baptyń 4-bólimi, 2-tarmaǵyna sáikes aiyp taǵylyp otyr.
Osyǵan deiin Qýandyq Bishimbaevtyń advokattary Seiit Rahmanov pen Mádi Myrzaǵaraev eks-ministrge taǵylyp otyrǵan aiyptardyń negizsiz ekenin aitqan. Qorǵaýshylar tipti Bishimbaev isindegi óreskel burmalaýshylyqtardy atap kórsetken edi. Olardyń aitýynsha, Qýandyq Bishimbaev sottyń ádil ótetinine senedi. Budan keiin sot Bishimbaevty qylmystyq jaýapkershilikten bosatýdan bas tartty.
Sýret: Azattyq saitynan alyndy
