بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ سوت زالىندا مەملەكەت باسشىسى نۇرسۇلتان نازاربايەۆتان كەشىرىم سۇرادى، دەپ حابارلايدى Baq.kz.
ەكس-مينيستر سوتتا وزىنە تاعىلعان ايىپتارعا قاتىستى تەك شىندىقتى ايتاتىنىن ءارى جىبەرگەن قاتەلىگى ءۇشىن حالىقتان كەشىرىم سۇرايتىنىن جەتكىزدى.
«مەنىڭ بۇل ىسكە قاتىسىم جوق. مۇنى ءبىزدىڭ قوعامعا جانە ەڭ ماڭىزدىسى قازاقستان پرەزيدەنتى، ۇلت كوشباسشىسى نۇرسۇلتان نازاربايەۆقا جەتكىزگىم كەلەدى. وسىنداي كاسىبي دەڭگەيگە جەتۋىم سول كىسىنىڭ ارقاسى.
پرەزيدەنتتىڭ الدىندا كىنالى ەكەنىمدى سەزەمىن. سەنىم ارتىپ، جۇمىسقا شاقىرعان ازاماتتار مەنى جارعا جىقتى.
مەن سول ءۇشىن جاۋاپ بەرەمىن. ولار مەنى جانە سەنىمىمدى پايدالاندى. سول ءۇشىن مەن ەلباسىدان، حالىقتان كەشىرىم سۇرايمىن. وسى جاعدايعا قاراماستان مەن ءارقاشان پرەزيدەنتكە بەرىلگەن ازامات بولامىن»، - دەدى ەكس-مينيستر سوت زالىندا.
ايتا كەتەيىك، 31 قازان كۇنى استانادا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ جانە اتالعان ىسكە قاتىسى بار دەپ كۇدىككە ىلىنگەن 22 ازاماتقا قاتىستى الدىن الا سوت تەرگەۋى باستالدى. بۇرىنعى مينيسترگە قىلمىستىق كودەكستىڭ «پارا الۋ» - 366-بابى، 4-تارماعىنا، سونداي-اق «سەنiپ تاپسىرىلعان بوتەن ءمۇلiكتi يەمدەنiپ الۋ نەمەسە تالان-تاراجعا سالۋ» - 189-باپتىڭ 4ء-بولىمى، 2-تارماعىنا سايكەس ايىپ تاعىلىپ وتىر.
وسىعان دەيىن قۋاندىق بيشىمبايەۆتىڭ ادۆوكاتتارى سەيىت راحمانوۆ پەن ءمادي مىرزاعارايەۆ ەكس-مينيسترگە تاعىلىپ وتىرعان ايىپتاردىڭ نەگىزسىز ەكەنىن ايتقان. قورعاۋشىلار ءتىپتى بيشىمبايەۆ ىسىندەگى ورەسكەل بۇرمالاۋشىلىقتاردى اتاپ كورسەتكەن ەدى. ولاردىڭ ايتۋىنشا، قۋاندىق بيشىمبايەۆ سوتتىڭ ءادىل وتەتىنىنە سەنەدى. بۇدان كەيىن سوت بيشىمبايەۆتى قىلمىستىق جاۋاپكەرشىلىكتەن بوساتۋدان باس تارتتى.
سۋرەت: ازاتتىق سايتىنان الىندى
