Qazaqstan musylmandar dini basqarmasynyń ókili Qýandyq Bishimbaev pen Saltanat Núkenovanyń nekesine qatysty málimdeme jasady, - dep habarlaidy Dalanews.kz.
Qazaqstan musylmandary dini basqarmasynyń Jarǵysyna sáikes QMDB-nyń resmi dini qyzmetkerleri Qazaqstan Respýblikasynyń qoldanystaǵy zańnamasy aiasynda jumys isteidi.
"Neke (erli-zaiyptylyq) jáne otbasy týraly" 2011 jylǵy 26 jeltoqsandaǵy Qazaqstan Respýblikasy Kodeksiniń 2-babynyń 3-tarmaǵynda tek memlekettik organdar qiǵan neke (erli-zaiyptylyq) ǵana moiyndalatyny belgilengen.
Osyǵan orai QMDB-nyń ishki jumys tártibiniń tiisti talabyna sáikes meshit qyzmetkerleri neke qiiý rásimi aldynda bolashaq erli-zaiyptylardan Azamattyq hal aktilerin tirkeý (AHAT) bólimine tirkelgenin rastaityn kýálikti talap etedi.
2022 jyldyń 17 qazanynda Astana qalasyndaǵy Respýblikalyq bas meshitte Qýandyq Bishimbaev pen Saltanat Núkenovanyń óz ótinishteri boiynsha kýágerlerdiń qatysýymen bolashaq erli-zaiyptylardyń nekesi qiylǵan. Ekeýinen jáne olardyń týystarynan AHAT bólimine tirkelgenin rastaityn kýálik talap etilgende «jasalý ústinde» dep jaýap bergen. Sonymen qatar dástúrge sai eki jaqtyń ata-analarynyń batasy men ruqsatyn alǵanyn, salt-dástúr jolymen nekelerin qiyp berýin ótingen.
Bishimbaev pen Núkenovadan AHAT bólimine tirkelgenin rastaityn kýálikti tabandy túrde talap etpegen, iaǵni QMDB-nyń ishki jumys tártibin buzǵan Respýblikalyq bas meshit imamy Q.Qydyrminge tártiptik shara qoldanylyp, eskertý jasaldy.
"Qazaqstan musylmandary dini basqarmasy AHAT bóliminde resmi tirkelmegen, dinimiz ben dástúrimizge qaishy keletin «azamattyq nekemen» úilenýdiń shariǵattaǵy úkimi haram ekenin taǵy da habarlaidy. QMDB Qazaqstan azamattaryn arty opyq jegizetin mundai aýyr ári las kúnáli isterden aýlaq bolýǵa shaqyrady", - delingen habarlamada.
