قازاقستان مۇسىلماندار ءدىني باسقارماسىنىڭ وكىلى قۋاندىق بيشىمبايەۆ پەن سالتانات نۇكەنوۆانىڭ نەكەسىنە قاتىستى مالىمدەمە جاسادى، - دەپ حابارلايدى Dalanews.kz.
قازاقستان مۇسىلماندارى ءدىني باسقارماسىنىڭ جارعىسىنا سايكەس قمدب-نىڭ رەسمي ءدىني قىزمەتكەرلەرى قازاقستان رەسپۋبليكاسىنىڭ قولدانىستاعى زاڭناماسى اياسىندا جۇمىس ىستەيدى.
"نەكە (ەرلى-زايىپتىلىق) جانە وتباسى تۋرالى" 2011 جىلعى 26 جەلتوقسانداعى قازاقستان رەسپۋبليكاسى كودەكسىنىڭ 2-بابىنىڭ 3-تارماعىندا تەك مەملەكەتتىك ورگاندار قيعان نەكە (ەرلى-زايىپتىلىق) عانا مويىندالاتىنى بەلگىلەنگەن.
وسىعان وراي قمدب-نىڭ ىشكى جۇمىس ءتارتىبىنىڭ ءتيىستى تالابىنا سايكەس مەشىت قىزمەتكەرلەرى نەكە قيۋ ءراسىمى الدىندا بولاشاق ەرلى-زايىپتىلاردان ازاماتتىق حال اكتىلەرىن تىركەۋ (احات) بولىمىنە تىركەلگەنىن راستايتىن كۋالىكتى تالاپ ەتەدى.
2022 جىلدىڭ 17 قازانىندا استانا قالاسىنداعى رەسپۋبليكالىق باس مەشىتتە قۋاندىق بيشىمبايەۆ پەن سالتانات نۇكەنوۆانىڭ ءوز وتىنىشتەرى بويىنشا كۋاگەرلەردىڭ قاتىسۋىمەن بولاشاق ەرلى-زايىپتىلاردىڭ نەكەسى قيىلعان. ەكەۋىنەن جانە ولاردىڭ تۋىستارىنان احات بولىمىنە تىركەلگەنىن راستايتىن كۋالىك تالاپ ەتىلگەندە «جاسالۋ ۇستىندە» دەپ جاۋاپ بەرگەن. سونىمەن قاتار داستۇرگە ساي ەكى جاقتىڭ اتا-انالارىنىڭ باتاسى مەن رۇقساتىن العانىن، ءسالت-داستۇر جولىمەن نەكەلەرىن قيىپ بەرۋىن وتىنگەن.
بيشىمبايەۆ پەن نۇكەنوۆادان احات بولىمىنە تىركەلگەنىن راستايتىن كۋالىكتى تاباندى تۇردە تالاپ ەتپەگەن، ياعني قمدب-نىڭ ىشكى جۇمىس ءتارتىبىن بۇزعان رەسپۋبليكالىق باس مەشىت يمامى ق.قىدىرمينگە تارتىپتىك شارا قولدانىلىپ، ەسكەرتۋ جاسالدى.
"قازاقستان مۇسىلماندارى ءدىني باسقارماسى احات بولىمىندە رەسمي تىركەلمەگەن، ءدىنىمىز بەن داستۇرىمىزگە قايشى كەلەتىن «ازاماتتىق نەكەمەن» ۇيلەنۋدىڭ شاريعاتتاعى ۇكىمى حارام ەكەنىن تاعى دا حابارلايدى. قمدب قازاقستان ازاماتتارىن ارتى وپىق جەگىزەتىن مۇنداي اۋىر ءارى لاس كۇنالى ىستەردەن اۋلاق بولۋعا شاقىرادى"، - دەلىنگەن حابارلامادا.
