Saltanat Núkenovany óltirdi dep aiyptalǵan burynǵy ulttyq ekonomika ministr Qýandyq Bishimbaev pen osy is boiynsha ekinshi aiyptalýshy Baqytjan Baijanov jazasyn qaida óteitini aityldy, - dep habarlaidy Dalanews.kz.
Sot úkimimen eks-ministr jazasyn qaýipsizdigi eń joǵary túzeý mekemesinde óteidi. Oǵan sot 24 jyl bas bostandyǵynan aiyrý jazasyn taǵaiyndady. Ol "azaptaý" jáne "kisi óltirý" baptary boiynsha kináli dep tanyldy.
Ekinshi sottalýshy Baqytjan Baijanov jazasyn qaýipsizdigi ortasha koloniiada óteidi. Oǵan shyqqan úkim - 4 jylǵa bas bostandyǵynan aiyrý. Ol qylmysty jasyrǵany úshin kináli dep tanyldy.
Sottalýshylardyń kinási sotta tolyq dáleldendi.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube arnasynan onlain qarady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵady.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova, Igor Vranchev.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- azaptaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
