سالتانات نۇكەنوۆانى ءولتىردى دەپ ايىپتالعان بۇرىنعى ۇلتتىق ەكونوميكا مينيستر قۋاندىق بيشىمبايەۆ پەن وسى ءىس بويىنشا ەكىنشى ايىپتالۋشى باقىتجان بايجانوۆ جازاسىن قايدا وتەيتىنى ايتىلدى، - دەپ حابارلايدى Dalanews.kz.
سوت ۇكىمىمەن ەكس-مينيستر جازاسىن قاۋىپسىزدىگى ەڭ جوعارى تۇزەۋ مەكەمەسىندە وتەيدى. وعان سوت 24 جىل باس بوستاندىعىنان ايىرۋ جازاسىن تاعايىندادى. ول "ازاپتاۋ" جانە "كىسى ءولتىرۋ" باپتارى بويىنشا كىنالى دەپ تانىلدى.
ەكىنشى سوتتالۋشى باقىتجان بايجانوۆ جازاسىن قاۋىپسىزدىگى ورتاشا كولونيادا وتەيدى. وعان شىققان ۇكىم - 4 جىلعا باس بوستاندىعىنان ايىرۋ. ول قىلمىستى جاسىرعانى ءۇشىن كىنالى دەپ تانىلدى.
سوتتالۋشىلاردىڭ كىناسى سوتتا تولىق دالەلدەندى.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعادى.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا، يگور ۆرانچيەۆ.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- ازاپتاۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
