Eks-ministr Qýandyq Bishimbaevqa qatysty sot otyrysy áli jalǵasyp jatyr. Protsess barysynda marqum Saltanat Núkenovanyń qurbysy Aida Ahmedina jaýap berdi, - dep habarlaidy Dalanews.kz.
Kýáger Aida Ahmedina oqiǵa bolǵan kúni olarmen birge kontsertke barǵan. Onyń sózinshe, Saltanat Núkenova Qýandyq Bishimbaevpen aradaǵy jaittardy buǵan deiin de birneshe ret aitqan.
Al kontsertte olar sózge kele bastaǵan.
"Saltanyń janynda otyrdym. "Nege urysyp jatsyńdar?" dep suradym. "Bári durys" dedi. Olar birdeńege kelise almai jatty. Men Qýandyqqa "nege urysyp jatsyńdar, kontserttemiz ǵoi" dedim. Keiin sahnaǵa qarap otyrdyq. Bir kezde Qýandyq Saltanatqa birdeńe aityp jatty. Saltanat jylai bastady. Men oǵan syrtqa shyǵyp kelýdi usyndym. "Joq, biz sóilesip otyrmyz" dedi de kóz jasyn súrtti. Bir kezde Salta turyp ketti, sóitip olar ketip qaldy. Men olar ketip bara jatyr dep oilamadym, qazir keletin shyǵar dep otyrdym. Bir kezde Saltadan habarlama keldi. "Meniń nómirim (garderobtaǵy nómir) sol jaqta" dedi. Olar ketkisi keletin shyǵar dep ózim de shyqtym. Olar kiim aýystyratyn jerde bolmady. Dárethanada da bolmady. Ketip qaldy ma dep oiladym", - dedi kýáger.
Sonymen qatar, ol Bishimbaev Núkenovaǵa kontsert kezinde ne aitqanyn estimegenin, tek bir sát esinde ekenin aitty.
"Bilmeimin. Salta "men sen úshin bárin istedim" dedi. Bishimbaev "bári degen ne?" dedi", - dep eske aldy ol.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
