Áıelin óltirdi degen aıyp taǵylyp otyrǵan eks-mınıstr Qýandyq Bıshimbaevtyń isi boıynsha alqabıler tańdaldy, - dep habarlaıdy Dalanews.kz.

Búgin elordanyń qylmystyq ister jónindegi mamandandyrylǵan aýdanaralyq sotynda Qýandyq Bıshimbaevtyń isi boıynsha alqabılerdi irikteý ótti.

Alqabıler alqasyna 12 adam tańdaldy: 10 – negizgi quram, 2 – qosalqy. Ashyq rejımde ótetin kelesi sot otyrysy saǵat 16:00-ge belgilendi.

Buǵan deıin Joǵarǵy sot aldaǵy sot otyrystaryna qatysty málimdeme jasady.

"Qýandyq Bıshimbaevqa qatysty sot prosesine qoǵamnyń joǵary qyzyǵýshylyǵyn eskere otyryp, osy is boıynsha ashyq sot otyrystarynyń onlaın-translásıasyn uıymdastyrý týraly sheshim qabyldandy", - dep jazylǵan edi habarlamada.

Aıta keteıik, byltyr Qýandyq Bıshimbaev áıelin uryp óltirdi degen kúdikpen qamaýǵa alyndy. Qazir sot otyrysy ótip jatyr. Burynǵy ulttyq ekonomıka mınıstri Qýandyq Bıshimbaevtyń bul birinshi qylmystyq isi emes.

Ol 2018 jylǵy naýryzda 10 jylǵa bas bostandyǵynan aıyrylǵan bolatyn. Burynǵy sheneýnik para alý jáne aqsha jymqyrý isterinde aıypty dep tanylǵan edi. Bıshimbaevtyń sot isi tórt aıdan asa ýaqytqa sozyldy. Onymen birge bul iste 22 adam sotqa tartylǵan edi. Olar "Báıterek DEVELOPMENT" AQ eks-qyzmetkerleri, kásipkerler jáne qurylys kompanıalarynyń ókilderi boldy. Eks-sheneýnik 10 jylǵa sottalsa da, týra 19 aı ótkende bostandyqqa shyqty.