Áielin uryp óltirdi degen aýyr aiyp taǵylyp otyrǵan eks-ministr Qýandyq Bishimbaevtyń atyshýly isi boiynsha keshe aldyn ala tyńdaýdyń ekinshi kúni ótti. Sot otyrysy barysynda mańyzdy málimdeme jasaldy.
Sýdia Aijan Qulbaeva sottalýshy Bishimbaevtyń ótinishi qanaǵattandyrylatynyn, iaǵni bul iske alqabiler de qatysatynyn málimdedi. Al qoǵamda alqabiler sotyna kúmán de, kúdik te basym. Kópshilik arasynda "Bishimbaevtyń jaqyndary alqabilerdi satyp almai ma?" degen pikir de bar. Májilis depýtaty, zańger Abzal Quspan bul alańdaýshylyqqa eshqandai sebep joq ekenin málimdedi, - dep habarlaidy Dalanews.kz.
Májiliste jýrnalisterdiń suraqtaryna jaýap bergen Abzal Quspan alqabiler sotynyń mánin túsindirdi. Onyń sózinshe, alqabiler quramyn irikteý sot protsesine qatysýshylardyń báriniń qatysýymen ótedi. Bul degenimiz - jábirlenýshi tarap, sottalýshy tarap, advokattar. Máselen, 25 adam bolsa, ishinen 12 adam tańdalady. On adamy alqabiler quramyna kiredi de, qalǵan eki adam túrli jaǵdailarda ornyn almastyrady.
Budan bólek zańger alqabiler quramyna irikteýde túrli printsip qarastyrylatynyn aitty.
Sonymen qatar, 10 alqabidiń altaýy aqtasa, sottalýshy bosap shyǵýy da múmkin eken.
"Kináli, kinásiz degen másele kópshilik daýyspen sheshiledi. Qoldanystaǵy zań boiynsha 10 alqabidiń altaýy kinásiz deitin bolsa, aqtalady. Sýdia mundai jaǵdaida tiisti sot úkimin daiyndaýǵa mindetti", - dedi ol.
Depýtat Qazaqstanda áli de alqabiler soty damymaǵanyn, sondyqtan jumys tobynda kóptegen ózgeris engizý qarastyrylyp otyrǵanyn málimdedi.
"Birinshiden, alqabiler sotynda qaralatyn qylmystyq isterdiń sanatyn keńeitý máselesi tur. ...Qazirgi tańda alqabiler sotynda qaraltyn qylmystyq ister óte az", - dedi zańger.
Abzal Quspan qoǵamdy alańdatqan basty suraqqa da jaýap berdi.
"Meniń oiymsha, alańdaýǵa eshqandai negiz joq. Nege? Alqabiler degenimiz - ol da osy qoǵamnyń ókili. Bul jerde kásibi sýdia qatysady. On sýdianyń biri - kásibi sýdia, qalǵany alqabiler quramynda. Suraǵyńyzdyń tórkininde sybailas jemqorlyqqa aparyp soqtyrmai ma, qandai da bir jolmen satyp alý degen sózdi aityp otyrsyz. Bir adamdy satyp alǵan ońai ma, on adamdy satyp alǵan ońai ma? Qarapaiym suraq. Bir sýdiaǵa senbeitin bolsaq, alqabilerge de senbeitin bolsaq, úkimdi kim shyǵarýy kerek? Qoǵamnyń nazarynda bolǵandyqtan, ádiletti sot aktisi shyǵatynyna óz basym tolyq senemin", - dedi ol.
Aita keteiik, Májilis búgin alqabiler sotyna qatysty mańyzdy aqparattardy jariialady. Málimetke súiensek, alqabiler sotynda sheshimdi keńesý bólmesinde sýdianyń qatysýynsyz 11 alqabi qabyldaidy.
"Qylmystyq is alqabilerdiń qatysýymen qaralyp, sońynda alqabiler keńesý bólmesinde qalady.
Depýtattar isti qarap otyrǵan sýdia alqabilermen bir bólmede qalmaýy kerek degen normany engizip otyr. Sýdia óziniń kabinetinde otyrýy kerek, alqabiler sýdiasyz sheshim qabyldap, sol hattamany kásibi sýdiaǵa tabys etip, sol boiynsha ol sheshim shyǵarýy qajet.
Bul norma azamattardyń quqyǵyn qorǵaýǵa basymdyq berý maqsatymen engizilip otyr", - dep jazylǵan Májilistiń baspasóz qyzmeti aqparatynda.
Aita keteiik, keshe sot Qýandyq Bishimbaevtyń isin prokýrorǵa qaitarýdan bas tartty.
Eske salaiyq, byltyr Qýandyq Bishimbaev áieli Saltanat Núkenovany óltirdi degen kúdikpen qamaýǵa alynǵan edi. Oqiǵa 2023 jyly 9 qarashada Astana qalasyndaǵy BAU meiramhanasynda boldy.
