Aqtóbedegi qaqtyǵys saldarynan 20 adam qaza tapty. Onyń jeteýi áskeri qyzmetker men beibit turǵyndar bolsa, qalǵandary kúsh qurylymdary «lańkes» dep ataǵan órimdei qazaq jigitteri.
9 maýsymda ótken jalpyulttyq aza tutý kúninde sol jigitterdiń esimderi atalmady. Amankeldi Aitaly aitpaqshy, olardyń ata-anasy men týystaryna kóńil aitylmady. Mundai oqys áreketke bastaǵan sebepter jóninde bizge áli eshteme belgisiz.
Kúsh qurylymdary tarapynan óltirilgen 13 jigit osy qoǵamnyń perzentteri edi. Eshbiri aspannan túsken joq. Bári de ata-ananyń úmit kútken uldary bolatyn. Mektep partasynda otyrdy, áskerde mindetti boryshyn ótegenderi de bar shyǵar. Sol jastardyń qyrshynynan qiylýyna ózimiz kinálimiz.
Olardyń soiqandy sodyrlyq jolyna túsýine túrtki bolǵan eń aldymen – memlekettik bilik.
Eger elimizde durys ulttyq ideologiia qalyptasqan bolsa, jastarǵa ońdy patriottyq sezim darytylǵan bolsa, adaldyq pen ádildik tý etilse biz mundai qasiretke ushyramaǵan bolar edik. Ulttyq ideologiialyq keńistiktegi vakkým, jalǵan urandar, kózboiaýshylyq pen korrýptsiia jastardyń erteńge degen senimin joiyp, «baqytty» basqa jaqtan izdeýge májbúr etip otyr.
Óziniń azamattyq quqyǵyn júzege asyrmaq bolǵandar –shetelden 150 dollar aqsha alǵan satqyn, aqiqatty aitqysy kelgender – ideialyq jaý, kriminaldyq belsendiler – tóńkeriske umtylǵan saiasi qarsylas tanylǵan búgingi kúnde halyq biliktiń ár sózinen múlde qarama-qaishy maǵyna izdeitin boldy.
Is júzinde Aqtóbedegi qaqtyǵys memlekettiń jibergen ideologiialyq qatelikteriniń qaqtyǵysy. Ókinishke qarai bilik ony moiyndamaidy. «Aldymen –ekonomika, saiasat – odan soń» ustanymy qate ekendigin ómir kórsetti. Qoǵamnyń irgetasy ekonomika emes ulttyq ideologiia bolý kerek. Bizge ádette eshqashan ólmeitin el siiaqty aqylǵa qonymsyz birdemeler tyqpalanyp jatady.
Jalǵan irgetastyń ústine shynaiy ǵimarat salýǵa bola ma?! Óz basym jazyqsyz qaza tapqan 7 jigittiń otbasymen qosa ideologiialyq vakkým saldarynan jańylys jolǵa túsken 13 qazaq jigitiniń otbasyna da qaiǵylaryna ortaqtasyp kóńil aitamyn.
Автордың Фейсбуктегі парақшасынан алынды.
