Májilis depýtaty ári zańger Abzal Quspan Antikordyń burynǵy tóraǵasy, burynǵy Bas prokýror Qairat Qojamjarovqa qatysty qozǵalǵan qylmystyq is jóninde Pikir Media YouTube arnasyna bergen suhbatynda pikir bildirdi, dep habarlaidy Dalanews.kz.
Depýtattyń aitýynsha, Bas prokýratýra isti Qojamjarovtyń basshylyq qyzmette bolǵan kezeńindegi laýazymyn asyra paidalaný jáne qylmystyq jolmen alynǵan qarajatty zańdastyrý faktileri boiynsha tirkegen. Alaida bul is kúdikti elden ketkennen keiin ǵana qozǵalǵanyn atap ótti.
“Qojamjarovqa qatysty qylmystyq is qozǵaldy degen alǵashqy habar taraǵan kezde, plenarlyq otyrystan shyǵyp kele jatqanda jýrnalister osy týraly suraq qoiǵan edi. Sol kezde birden: “Buǵan bórkimizdi aspanǵa atyp qýanýdyń qajeti joq”, - dep aitqanmyn. Óitkeni men ol kisi týraly pikirimdi bilikte júrgen kezinde de, advokat bolyp júrgende de ashyq bildirgenmin”, - dedi ol.
Quspannyń pikirinshe, Qojamjarov quqyq qorǵaý júiesin basqarǵan kezeńinde sybailas jemqorlyqpen shynaiy kúres júrgizbegen. Kerisinshe, ol kóptegen qazaqstandyq kásipkerlerdiń sottalýyna sebep bolǵan.
“Shynyn aitý kerek, ol quqyq qorǵaý salasynyń birinshi basshysy bola tura, sybailas jemqorlyqpen shynaiy kúres júrgizbedi. Kerisinshe, kóptegen jazyqsyz qazaqstandyq kásipkerlerdiń sottalýyna sebepshi boldy. Qajet bolsa, advokat bolǵan kezimde bergen suhbattardyń siltemesin de usyna alamyn. Sol kezde Qojamjarovqa da, Kekselge de qatysty naqty mysaldar keltirgenmin. Ókinishke qarai, kórshi eldiń tapsyrmasymen bizdiń biznesti tunshyqtyrý quralyna ainaldy degen pikir aitqanmyn. Árine, qazir muny emotsiiamen qabyldaityndar bar, biraq men sózimnen bas tartpaimyn. Sol kezde de: “Qashan qolyna kisen salynyp, ustaldy degen habar shyqsa, sonda ǵana bul shynaiy jańalyq bolady”, - dep aitqan edim. Aradan ailar ótti, biraq áli kúnge deiin naqty “ustaldy, qamaýǵa alyndy, tergeý bastaldy” degen resmi habar joq”, - dep qosty ol.
Depýtattyń paiymynsha, buryn quqyq qorǵaý jáne antikor organdaryn basqarǵan tulǵanyń qolynda memlekettik qyzmetshiler men saiasi qairatkerlerge qatysty qupiia málimetter bolýy múmkin.
“Bul jaǵdai bireýlerge tiimdi bolýy múmkin degen oi keledi. Óitkeni ol buryn Bas prokýror bolǵan, Antikor siiaqty arnaiy qyzmetti basqarǵan, ákim qyzmetin atqarǵan adam. Osyndai laýazymdarda júrgen adamnyń qolynda kóptegen memlekettik qyzmetshiler men saiasi tulǵalarǵa qatysty naqty qujattar men dálelder bolýy ábden múmkin. Memleket saiasatyn júzege asyratyn - naqty adamdar. Ministrler, komitet tóraǵalary, tergeý organdarynyń basshylary - bári de belgili tulǵalar. Osyndai jaǵdaida qupiia málimetter men qujattar adamnyń "saqtandyrý quralyna" ainalýy múmkin”, - deidi ol.
Suhbat barysynda depýtat mundai jaǵdailardyń týyndaýyna joǵary laýazymdarǵa taǵaiyndaý kezinde tiisti tekserýlerdiń jetkiliksiz júrgizilýi de sebep bolýy yqtimal ekenin aitty.
“Bizde aýyldyq okrýg ákimine kandidattyń ózin túbegeili tekseredi: sottalǵan-sottalmaǵanyn, ómirbaianyn, saiasi kózqarasyn. Al eldiń quqyq qorǵaý júiesiniń basyna keletin adamǵa qatysty dál sondai tereń tekserý júrgizilýi tiis edi”, - dep túiindedi ol.
