ءماجىلىس دەپۋتاتى ءارى زاڭگەر ابزال قۇسپان انتيكوردىڭ بۇرىنعى ءتوراعاسى، بۇرىنعى باس پروكۋرور قايرات قوجامجاروۆقا قاتىستى قوزعالعان قىلمىستىق ءىس جونىندە Pikir Media YouTube ارناسىنا بەرگەن سۇحباتىندا پىكىر ءبىلدىردى، دەپ حابارلايدى Dalanews.kz.
دەپۋتاتتىڭ ايتۋىنشا، باس پروكۋراتۋرا ءىستى قوجامجاروۆتىڭ باسشىلىق قىزمەتتە بولعان كەزەڭىندەگى لاۋازىمىن اسىرا پايدالانۋ جانە قىلمىستىق جولمەن الىنعان قاراجاتتى زاڭداستىرۋ فاكتىلەرى بويىنشا تىركەگەن. الايدا بۇل ءىس كۇدىكتى ەلدەن كەتكەننەن كەيىن عانا قوزعالعانىن اتاپ ءوتتى.
“قوجامجاروۆقا قاتىستى قىلمىستىق ءىس قوزعالدى دەگەن العاشقى حابار تاراعان كەزدە، پلەنارلىق وتىرىستان شىعىپ كەلە جاتقاندا جۋرناليستەر وسى تۋرالى سۇراق قويعان ەدى. سول كەزدە بىردەن: “بۇعان بوركىمىزدى اسپانعا اتىپ قۋانۋدىڭ قاجەتى جوق”، - دەپ ايتقانمىن. ويتكەنى مەن ول كىسى تۋرالى پىكىرىمدى بيلىكتە جۇرگەن كەزىندە دە، ادۆوكات بولىپ جۇرگەندە دە اشىق بىلدىرگەنمىن”، - دەدى ول.
قۇسپاننىڭ پىكىرىنشە، قوجامجاروۆ قۇقىق قورعاۋ جۇيەسىن باسقارعان كەزەڭىندە سىبايلاس جەمقورلىقپەن شىنايى كۇرەس جۇرگىزبەگەن. كەرىسىنشە، ول كوپتەگەن قازاقستاندىق كاسىپكەرلەردىڭ سوتتالۋىنا سەبەپ بولعان.
“شىنىن ايتۋ كەرەك، ول قۇقىق قورعاۋ سالاسىنىڭ ءبىرىنشى باسشىسى بولا تۇرا، سىبايلاس جەمقورلىقپەن شىنايى كۇرەس جۇرگىزبەدى. كەرىسىنشە، كوپتەگەن جازىقسىز قازاقستاندىق كاسىپكەرلەردىڭ سوتتالۋىنا سەبەپشى بولدى. قاجەت بولسا، ادۆوكات بولعان كەزىمدە بەرگەن سۇحباتتاردىڭ سىلتەمەسىن دە ۇسىنا الامىن. سول كەزدە قوجامجاروۆقا دا، كەكسەلگە دە قاتىستى ناقتى مىسالدار كەلتىرگەنمىن. وكىنىشكە قاراي، كورشى ەلدىڭ تاپسىرماسىمەن ءبىزدىڭ بيزنەستى تۇنشىقتىرۋ قۇرالىنا اينالدى دەگەن پىكىر ايتقانمىن. ارينە، ءقازىر مۇنى ەموسيامەن قابىلدايتىندار بار، ءبىراق مەن سوزىمنەن باس تارتپايمىن. سول كەزدە دە: “قاشان قولىنا كىسەن سالىنىپ، ۇستالدى دەگەن حابار شىقسا، سوندا عانا بۇل شىنايى جاڭالىق بولادى”، - دەپ ايتقان ەدىم. ارادان ايلار ءوتتى، ءبىراق ءالى كۇنگە دەيىن ناقتى “ۇستالدى، قاماۋعا الىندى، تەرگەۋ باستالدى” دەگەن رەسمي حابار جوق”، - دەپ قوستى ول.
دەپۋتاتتىڭ پايىمىنشا، بۇرىن قۇقىق قورعاۋ جانە انتيكور ورگاندارىن باسقارعان تۇلعانىڭ قولىندا مەملەكەتتىك قىزمەتشىلەر مەن ساياسي قايراتكەرلەرگە قاتىستى قۇپيا مالىمەتتەر بولۋى مۇمكىن.
“بۇل جاعداي بىرەۋلەرگە ءتيىمدى بولۋى مۇمكىن دەگەن وي كەلەدى. ويتكەنى ول بۇرىن باس پروكۋرور بولعان، انتيكور سياقتى ارنايى قىزمەتتى باسقارعان، اكىم قىزمەتىن اتقارعان ادام. وسىنداي لاۋازىمداردا جۇرگەن ادامنىڭ قولىندا كوپتەگەن مەملەكەتتىك قىزمەتشىلەر مەن ساياسي تۇلعالارعا قاتىستى ناقتى قۇجاتتار مەن دالەلدەر بولۋى ابدەن مۇمكىن. مەملەكەت ساياساتىن جۇزەگە اسىراتىن - ناقتى ادامدار. مينيسترلەر، كوميتەت ءتوراعالارى، تەرگەۋ ورگاندارىنىڭ باسشىلارى - ءبارى دە بەلگىلى تۇلعالار. وسىنداي جاعدايدا قۇپيا مالىمەتتەر مەن قۇجاتتار ادامنىڭ "ساقتاندىرۋ قۇرالىنا" اينالۋى مۇمكىن”، - دەيدى ول.
سۇحبات بارىسىندا دەپۋتات مۇنداي جاعدايلاردىڭ تۋىنداۋىنا جوعارى لاۋازىمدارعا تاعايىنداۋ كەزىندە ءتيىستى تەكسەرۋلەردىڭ جەتكىلىكسىز جۇرگىزىلۋى دە سەبەپ بولۋى ىقتيمال ەكەنىن ايتتى.
“بىزدە اۋىلدىق وكرۋگ اكىمىنە كانديداتتىڭ ءوزىن تۇبەگەيلى تەكسەرەدى: سوتتالعان-سوتتالماعانىن، ءومىربايانىن، ساياسي كوزقاراسىن. ال ەلدىڭ قۇقىق قورعاۋ جۇيەسىنىڭ باسىنا كەلەتىن ادامعا قاتىستى ءدال سونداي تەرەڭ تەكسەرۋ جۇرگىزىلۋى ءتيىس ەدى”، - دەپ تۇيىندەدى ول.
