Biyl Túrkistan oblysyndaǵy sapaly joldardyń úlesi 92 paiyzǵa jetedi
Túrkistan oblysyndaǵy avtomobil joldary men eldi meken kósheleriniń jalpy uzyndyǵy – 17 466,4 shaqyrym. Oblystyq jáne aýdandyq mańyzy bar avtomobil joldarynyń jaqsy jáne qanaǵatty jaǵdaidaǵy úlesi 2021 jyly 87%-ǵa jetse, 2022 jyly 92%-ǵa jetkizý josparlanyp otyr. Bul týraly brifingte Túrkistan oblystyq jolaýshylar kóligi jáne avtomobil joldary basqarmasynyń basshysy Rolan Ibragimov málimdedi, – dep habarlaidy Dalanews.kz Túrkistan oblysynyń Óńirlik kommýnikatsiialar qyzmetine silteme jasap.
Al atalǵan indikator kórsetkishin 2025 jylǵa deiin 99,5%-ǵa arttyrý kózdelgen.
– 2021 jyly qurylys-jóndeý jumystarymen jalpy 2070,9 shaqyrym jol men kósheler qamtyldy. Al «Aýyl – El besigi» baǵdarlamasy aiasynda 2021 jyly 326,5 shaqyrym kóshe paidalanýǵa berildi. 2022 jyly qurylys-jóndeý jumystarymen 1349,2 shaqyrym jol men kóshelerdi qamtý josparlanýda. Oblystyq mańyzy bar avtomobil joldarynyń boiynda – 410 kópir ornalasqan. Atalǵan kópirlerdiń 381 danasy jaqsy jáne qanaǵatty jaǵdaida bolsa, 29 kópir jóndeýdi qajet etedi, – dedi basqarma basshysy.
Sonymen qatar, Túrkistan oblysynda jalpy 349 turaqty baǵyt boiynsha 1 264 qoǵamdyq kólik qyzmet kórsetedi. Oblysta 2021 jyly 110 qoǵamdyq kólik jańartyldy.
Al Túrkistan halyqaralyq áýejaiy arqyly 2 halyqaralyq (Stambýl, Tashkent) jáne 10 respýblikaishilik áýe reisteri qatynaýda. 2021 jyly áýejai arqyly 298 myń jolaýshy tasymaldanǵan. Odan bólek, 2021 jyly jalpy 192 charterlik reistermen 835 adam tasymaldanǵan.
