Túrkistan oblysynda 807 eldimekenniń 737-si aýyz sýmen qamtamasyz etilgen. Respýblikalyq kórsetkishke sáikes, óńirdiń qalalary 100 paiyz, eldimekender 97,3 paiyzǵa aýyz sýmen qamtylǵan. Biyl aýyz sýmen qamtý boiynsha 63 jobany júzege asyrýǵa biýdjetten 15,7 mlrd teńge bólingen. Onyń ishinde, 34 nysan aǵymdaǵy jyly paidalanýǵa berilse, qalǵan 29 eldi nysan 2025 jylǵa ótpeli.
Jyl qorytyndysymen 29 eldi mekendegi 15 myńǵa jýyq halyq aýyz sýmen qamtamasyz etiledi.
Túrkistan oblysynda eldimekenderdi aýyz sýmen qamtý jumystary qarqyndy júrip jatyr. Atalǵan másele oblys ákimi apparatynyń aptalyq májilisinde kezekti ret talqylandy. Túrkistan oblysynyń ákimi Darhan Satybaldy turǵyndardy aýyz sýmen qamtýdyń mańyzdylyǵyna toqtalyp, qurylysy sozbalańǵa salynǵan nysandar boiynsha aýdan, qala ákimderimen jaýapty basqarma basshysyna naqty tapsyrma berdi. Jumysty durys atqarmaǵan merdigerlerdiń máselesin zań aiasynda qaraýdy tapsyrdy.
– Memleket basshysy 2025 jyldyń qorytyndysymen óńirimizdegi eldi mekenderdi 100 paiyz aýyz sýmen qamtamasyz etý mindetin júktedi. Aýyz sý – eń mańyzdy jáne birinshi másele. Sondyqtan árbir jobanyń barysyna jaýapkershilikpen qaraý kerek. Sondai-aq nysandardyń qurylysyna jaýapty tapsyrys berýshiler men merdigerlerdiń jumysyn qadaǵalaý kerek. Árbir sý nysany sapaly, ári ýaqtyly tapsyrylýy tiis. Aýyz sýmen qamtý boiynsha jańa tásilder, gidrogeologiialyq izdenister, jan-jaqty zertteýler júrgizý qajet. Tapsyrysty ýaqtyly oryndamai, aýyz sýdy keshiktirgen merdigerlermen zań aiasynda jumys júrgizińizder. Bul másele qatań baqylaýda tur, – dedi Darhan Satybaldy.
Oblystyq energetika jáne turǵyn úi-kommýnaldyq basqarmasynyń basshysy Rýslan Muzdybekovtyń aitýynsha, 41 eldi mekendi aýyz sýmen qamtý boiynsha júieli jumystar júrgizilýde.
Bul eldimekenderdi 100% aýyz sýmen qamtamasyz etý maqsatynda, «Túrkistan oblysy boiynsha aýyz sýmen qamtamasyz etýdiń 2023-2025 jyldarǵa arnalǵan is-shara jospary» bekitildi.
Josparǵa sáikes, 2024 jyly 50 eldi meken 24 saǵat aýyz sýmen qamtamasyz etiledi. Qalǵan, 133 eldi mekendi 2025-2027 jyldary aralyǵynda táýlik boiy aýyz sýmen qamtý josparlanýda.
