Taldyqorǵan qalasyndaǵy «Ulan» shaǵyn aýdanynyń 1990 jyldardan beri jóndeý kórmegen aýlalaryn abattandyrý jumystary biyl tolyq aiaqtalady. Bul týraly búgin oblys ákimi Beibit Isabaevtyń osy jáne qaladaǵy basqa da qurylys nysandaryn aralaýy kezinde aityldy,– dep habarlaidy Dalanews.kz
Aldymen qalanyń «Ulan» shaǵyn aýdanyna barǵan óńir basshysy aýlalardy abattandyrý jumystarynyń barysymen tanysty. Atalǵan shaǵyn aýdanda jalpy sany 14 aýla bolsa, sonyń 5-eýi ótken jyly jańǵyrtylǵan, al qalǵan 9-y biyl jańa keiipke enbek. Osy 9 aýlada «Firma Mega-Servis» merdiger kompaniiasy jumys isteýde.
Merdiger uiym ókiliniń aitýynsha, qurylys jumystary naýryz aiynyń ortasynan bastalǵan, kestege sáikes nysandy tamyzda aiaqtaý josparlanyp otyr, degenmen odan erte aiaqtaýǵa múmkindik bar. Qazirgi kezde demontajdaý aiaqtalyp, montaj jumystary 60 % atqaryldy. Qurylysqa qajetti material tolyq daiyn. Elektr jelileri tartyldy. Abattandyrý barysynda balalar oiyn alańy, oryndyqtar, jaryq shamdary, bordiýrler ornatylady. Qazir munda 30 adam, 7 tehnika jumyldyrylǵan. Osy oraida oblys basshysy jumystyń sapasyna erekshe mán berý kerek ekenin basa aitty:
- Ótken jyly qalanyń tozyǵy jetken aýlalaryn abattandyrý týraly sheshim qabyldap, osy iske kirisken edik. Sonyń ishinde únemi nazardan tys qalyp kele jatqan aýdandardyń biri retinde osy «Ulan» shaǵyn aýdanynyń 5 aýlasyn abattandyrdyq. Biyl qalǵan 9 aýlany kórkeitý jumystaryn tolyqtai aiaqtaýdy tapsyrǵanmyn. Byltyr qurylys jumystaryn merziminde, sapaly atqaryp, jaqsy baǵa aldyńyzdar. Biyl da osyndai qarqynda jumys istep, halyqtyń alǵysyn alasyzdar dep senemin. Jobany ýaqytynan buryn maýsym-shilde ailarynda bitiremiz dep otyrsyzdar. Biz úshin eń bastysy - ýaqytyly atqarylǵan sapaly jumys, - degen B. Isabaev shaǵyn aýdan turǵyndarynyń ótinishine sáikes jobada qosymsha kólik turaqtaryn qarastyrýdy da tapsyrdy. Iaǵni aýladaǵy avtomashinalar jedel járdem, órt sóndirý qyzmetiniń kólikterine bóget bolmaýy kerek.
Osy oraida byltyr abattandyrylǵan aýlalardyń turǵyndary jýrnalisterge óz pikirlerin aitty.
- Buryn alańy shańy shyǵyp, topyraq bolyp jatatyn. Úlken ulym dop oinaǵanda ústi-basy shań bolyp keletin. Al kishi balalarymdy aýlaǵa alyp shyqqanmen oinatatyn jer joq edi. Ótken jyly aýlamyzǵa balalar oiyn alańyn salyp, túrli átkenshekter, trenajer qurylǵylaryn ornatty, úlkender demalyp otyratyn oryn da qarastyrylǵan. Kórshi aýlalarda da jóndeý, abattandyrý jumystary júrip jatyr. Shaǵyn aýdanymyzdyń keipi biyl tutastai jańalanatynyn estip qýanyp qaldyq, - deidi kóp balaly ana Diana Toparbaeva.
Búgin aýlalaryna gúl egip, kógaldandyryp jatqan turǵyndardyń arasynda zeinetker ustaz, «Ulan» shaǵyn aýdanynyń turǵyny Maiia Saidildina da bar.
- Osy shaǵyn aýdanda turyp jatqanyma 7 jyldan asty. Búgin kórshilerimizben birge aýlaǵa gúl egip jatyrmyz. Qolymda turǵan «Tún arýy» degen gúldiń tuqymy. Oǵan qosa aǵash ta egemiz. Aýlamyz jańalanǵannan keiin ony kógaldandyrý, taza ustaý – óz qolymyzda. Osyndaǵy ár ata-ana balasyna jasalǵan eńbekti baǵalaý kerek ekenin, jańalanǵan aýlany kútip ustaý kerektigin úiretýi tiis. Zeinetker ustaz retinde júrgen ortamda osyny únemi aityp otyramyn, - deidi.
Osy kúni oblys basshysy «Jetisý» shaǵyn aýdanyndaǵy № 29 úidiń mańyndaǵy aýlany abattandyrý barysymen de tanysty. Máselen, osy shaǵyn aýdanda 2018-2024 jyldar aralyǵynda 11 aýla jóndelse, biylǵy jyldyń ózinde taǵy 11 aýla abattandyrylady.
Eske salsaq, jalpy biyl Taldyqorǵan qalasynda 39 aýlany abattandyrý josparlanǵan, sonyń 9-y - «Ulan», 11-i - «Jetisý», 11-i - «Juldyz» shaǵyn aýdandarynda. Sondai-aq «Halyq qatysatyn biýdjet» baǵdarlamasy aiasynda 20 mekenjaiǵa balalar oiyn jáne sport alańdaryn ornatý kózdelgen. Oǵan qosa biyl kóp qabatty 2 úidiń shatyry jóndelip, 20 kóp páterli úidiń qasbeti jańartylady.
Odan soń oblys basshysy qaladaǵy kórkem gimnastika ortalyǵy salynyp jatqan qurylys alańynda da boldy. Qazir munda jer qazý jumystary júrip jatyr. Jalpy alańy 2,2 myń sharshy metr bolatyn, bir aýysymda 90 adam qabyldai alatyn ýniversaldy jáne gimnastika zaldary qarastyrylǵan ortalyq qarasha aiynda iske qosylady dep josparlanyp otyr. Oblys ákimi mundaǵy qurylys qarqynynyń báseńdigin synǵa alyp, qala ákimdigine nysandy merziminde, sapaly bitirýdi qatań baqylaýǵa alýdy tapsyrdy.
