Ótken jyldan beri Semei qalasynda 54 turǵyn úidiń 35 aýlasy abattandyrylǵan. Biyl taǵy 70 aýla (160-tan astam turǵyn úi) jóndelmekshi. Sondai-aq, 15 qoǵamdyq oryndy abattandyrý josparlanyp otyr.
Aimaq basshysy Nurlan Uranhaev búgin Glinka 30, 32, Irtyshskaia 17, Ózbekskaia 40 kósheleriniń boiyndaǵy abattandyrý jumystary bastalǵan birneshe aýlany aralap kórdi.
– Biyl 70 aýlany abattandyramyz. Jumystardyń sapaly oryndalýyna basa mán beremiz, – dedi Nurlan Uranhaev.
Sondai-aq, qala men oblys úshin asa mańyzdy densaýlyq saqtaý nysandaryn salý máselesine de ákimdik basa kóńil bólýde. Aitalyq, ákimdik 400 oryndyq kópsalaly oblystyq aýrýhananyń, 150 tósektik balalar psihonevrologiialyq meditsinalyq-áleýmettik mekemesiniń, ýniversitettik emhananyń qurylysyna arnalǵan oryndar belgilep qoiǵan.
Investorlar esebinen qajetti qujattamany daiyndaý, sol arqyly biýdjet qarajaty únemdeý de kózdelgen.
Osy rette oblys ákimi Nurlan Uranhaev Volgogradskaia kóshesiniń boiyndaǵy bólingen jer telimderin aralap kórdi. Sondai-aq, Ushaqtar aýdanynda emhanamen birge 300 oryndyq kópsalaly balalar aýrýhanasynyń qurylysy júrýde. Oblys basshysy qurylys alańyn aralap kórip, óz oiyn ortaǵa saldy.
Qalanyń tirshiligimen tanysý kezinde Nurlan Uranhaev Bi-Boranbai kóshesiniń qiylysyndaǵy jol jamylǵysynyń jóndeý jumystaryn tekserdi. Biyl Semeide barlyǵy 40-qa jýyq kóshege asfalt tóselmek.
Jalpy qashyqtyǵy 7 shaqyrymdy quraityn qala kóshelerindegi tratýarlardy retke keltirip, 360 sharshy metr bolatyn asfaltbeton jabyndysyn tóseý josparlanǵan.
