Senat Tóraǵasy Máýlen Áshimbaev Batys Qazaqstan oblysyndaǵy jumys sapary kezinde Ulttyq quryltaidyń IV otyrysynda Memleket basshysy júktegen mindetterdi iske asyrý jáne Senattyń óńirlerdi damytýǵa yqpalyn odan ári kúsheitý máseleleri, sondai-aq, Palatanyń máslihattarmen birlesken jumysynyń mańyzdy baǵyttaryn talqylady,dep habarlaidy Dalanews.kz
Máýlen Áshimbaev Ádiletti, Qaýipsiz jáne Qýatty Qazaqstan qurý úshin el Prezidenti Ulttyq quryltaidyń IV otyrysynda belgilep bergen basymdyqtardy sapaly iske asyrýdyń mańyzdy ekenin atap ótti.
Sondai-aq Palata Spikeri barlyq deńgeidegi keshendi jumys, múddeli taraptardyń belsendiligi, syndarly ózara is-qimyl, sonyń ishinde qajetti zańdardy ýaqtyly qabyldaý, eń aldymen, elimizdiń tabysty ekonomikalyq damýynyń, óńirlerdiń órkendeýiniń jáne azamattardyń ál-aýqatynyń artýynyń kepili ekenin aitty.
«Prezidentimiz Qasym-Jomart Kemeluly Toqaev Ulttyq quryltaidyń IV otyrysynda elimizdi damytýǵa qatysty ózekti máselelerge keńinen toqtaldy. Óńirlerdiń ekonomikasyn órkendetý negizgi baǵyttardyń biri retinde belgilendi. Quryltaida ishki saiasat, ideologiia, bilim berý máselelerine de erekshe nazar aýdaryldy. Aitylǵan barlyq bastamalar Ádiletti, Qaýipsiz, Taza jáne Qýatty Qazaqstan qurý ideiasyn iske asyrýǵa arnalǵan. Osy jáne basqa da mindetterdi sapaly iske asyrý úshin júieli ári tiimdi jumys isteýimiz kerek», – dep, Senat Tóraǵasy oblystyq máslihat depýtattaryn ortaq maqsattarǵa qol jetkizý úshin Palatanyń zań shyǵarý qyzmetine belsendi qatysýǵa shaqyrdy.
Osyǵan bailanysty Máýlen Áshimbaev sáýir aiynda Máslihattarmen ózara is-qimyl jónindegi keńestiń jańa formattaǵy keńeitilgen otyrysyn ótkizý josparlanyp otyrǵanyn tilge tiek etti. Onda Memleket basshysy Máslihat depýtattarynyń II respýblikalyq forýmynda belgilep bergen mindetter talqylanbaq.
Sonymen qatar Máýlen Áshimbaev ekonomikany ártaraptandyrýdyń, óńdeýshi ónerkásip pen aýyl sharýashylyǵyn damytýdyń mańyzdy baǵyttaryna toqtaldy. Kezdesýde el Prezidentiniń óńirlerge qatysty investitsiialar tartý, jańa tehnologiialar engizý, jańa kásiporyndardy iske qosý jáne jumys oryndaryn ashý jónindegi ózekti bastamalary da talqylandy.
Is-sharada atap ótilgendei, qazirgi tańda Batys Qazaqstan oblysy ekonomikanyń ósý qarqyny boiynsha aitarlyqtai deńgeide. Sondai-aq byltyr sý tasqynynyń saldaryn joiý jáne biyl onyń aldyn alý baǵytyndaǵy jumystarda da joǵary nátijelerge qol jetkizilgeni sóz boldy.
«Búginde Batys Qazaqstan oblysy elimizde ónerkásip óndirisi, aýyl sharýashylyǵy, shaǵyn jáne orta biznes siiaqty mańyzdy salalardyń damýyna úlken úles qosyp otyr. Túrli baǵdarlamalar tabysty iske asyrylyp, óńirdiń ekonomikasy turaqty ósip keledi. Biyl 841 mlrd teńge investitsiia tartylyp, aýyl sharýashylyǵy, qaita óńdeý, ónerkásip, týrizm jáne taǵy basqa salalar boiynsha iri jobalardy iske asyrý kózdelýde. Byltyrǵy sý tasqynynyń saldaryn joiýǵa jáne zardap shekkenderge kómek kórsetýge qatysty Prezidentimiz júktegen mindetter jedel oryndalǵanyn da atap ótken jón. Biyl da sý tasqynynyń aldyn alý jumystary júieli túrde júrgizilip keledi. Senat óńirlerdiń múddesin qorǵaityn Palata retinde oblystardyń damýyna qoldaý kórsetý baǵytyndaǵy jumysty jalǵastyra beredi», – dedi Máýlen Áshimbaev.
Sonymen qatar senatorlar Mahambet Ótemisuly atyndaǵy Batys Qazaqstan ýniversitetinde óńirdiń belsendi jastarymen kezdesti. Onda qolǵa alynǵan reformalardy iske asyrý jáne el damýyndaǵy jastardyń róli jan-jaqty talqylandy. Senat Tóraǵasy atap ótkendei, ziiatker, bilimdi, jasampaz, zaman talaptaryna jedel beiimdeletin jastar – elimizdi jańǵyrtýdyń qozǵaýshy kúshi. Sondyqtan qazir jas býynǵa júieli qoldaý kórsetý úshin keshendi reformalar júzege asyrylyp, strategiialyq baǵdarlamalar men memlekettik jobalar qolǵa alynýda. Sonyń ishinde jańa formatsiiadaǵy mamandar daiarlaýdy kózdeitin bastamalardyń máni zor.
«Memleket basshysynyń bastamasymen elimizde aýqymdy saiasi, ekonomikalyq jáne áleýmettik reformalar júrgizilip jatyr. «Ulttyq qor – balalarǵa» baǵdarlamasy iske asyrylýda. «Keleshek» jinaqtaýshy júiesi týraly zań qabyldandy. «Bolashaq» baǵdarlamasy aiasynda shetelde oqý jáne taǵylymdamadan ótý múmkindikteri keńeitildi. Osylaisha, óskeleń urpaqtyń áleýmettik kepildikterin qamtamasyz etýge, sapaly bilim alýyna jáne jeke tulǵa retinde damýyna qajetti jaǵdai jasalyp otyr. Sondyqtan jastar da óz tarapynan el aldyndaǵy jaýapkershilikti sezinip, Memleket basshysy belgilep bergen Ádiletti Qazaqstan qalyptastyrý jolyndaǵy mindetterdi iske asyrý úshin bar kúsh-jigerin jumsaýǵa tiis», – dep, Palata Spikeri Senattyń zańnamalyq jumystaryna nazar aýdardy.
