Biyl Abai oblysynda «Bastaý biznes» baǵdarlamasy aiasynda 204 adamǵa qaitarymsyz 1,5 mln teńge berý josparlanǵan, dep habarlaidy Dalanews.kz "24.kz"-ke silteme jasap.
Byltyr 200-den astam adam «Bastaý biznes» baǵdarlamasy aiasynda memleketten qoldaý alǵan. Bul maqsatqa biýdjetten shamamen 300 million teńge bólingen. Osy qoldaýdyń arqasynda aýyl kásipkerleri kásiptik oqýdan ótip, óz isin óristetýge múmkindik alyp otyr.
Janna Amanova qysqa merzimdi kásiptik oqýdan ótip, tiginshi mamandyǵyn meńgeripti. Keiin qaitarymsyz 1,5 mln teńge grant alyp, úi ishinen kishigirim tigin tsehyn ashqan. Búginde jumysy alǵa basyp, kelýshiler qatary kóbeiipti. Endi tiginshi kásibin odan ári damytýdy josparlap otyr.
"Sheshemnen qalǵan óner ǵoi. Ózi oiýlar, kórpe-jastyq tigetin. Sony qarap, qyzyǵyp bala kezden. Tige berdik, tige berdik endi. Tigip úirenińder dep úiretti ǵoi anamyz. Basynda kórpe-jastyq qana tigetinmin. Qazir suranys kóp. Sómke tigý kerek, qazaq úidiń jabdyqtaryn suraidy kóbinese", - deidi Janna Amanova.
Al, Erlan Kenjeǵaliev sendvich shyǵaratyn shaǵyn tseh ashypty. 2020 jyldan beri taǵam ónerkásibi salasyna den qoiǵan. Byltyr memleketten 4 mln teńge qaitarymsyz grant aldy. Ónimin 100-ge jýyq dúken men iri saýda úilerine ótkizedi. Kásipker 6 adamdy turaqty jumyspen qamtyp otyr.
"Men ónimniń sapasyn jiti baqylap otyramyn. Qospalardyń sapaly bolýy ónimniń dámine tikelei áser etedi. Sondyqtan buǵan muqiiat qaraimyn. Biz shyǵaratyn nan ónimderin kóbinese jastar alyp jatady. Ózimniń balalarym da jeidi. Sondyqtan tazalyq pen sapa men úshin birinshi orynda", - deidi Erlan Kenjeǵaliev.
Biyl «Bastaý biznes» baǵdarlamasy aiasynda 204 adamǵa qaitarymsyz 1,5 mln teńge berý josparlanǵan. Al 5 mln teńgelik qaitarymsyz grant endi áleýmettik kásipkerler men «Bir aýyl – bir ónim» jobasynyń finalisterine beriledi. Iaǵni, oǵan aýylda turyp, shikizattan ónim jasap otyrǵan sharýalar qatysa alady.
"Osy jyldan bastap áleýmettik kásipkerlerge aýyldyń kisilerin, aýyldaǵy sharýa qojalyqtarynyń direktorlaryn shaqyryp jatyrmyz. 45 adamnyń on shaqtysy sharýa qojalyqtarynyń ieleri bolyp tabylady. Ol kisilerdi kirgizýge, ary qarai olardy granttyq qarjylandyrýǵa qatystyrýǵa atsalysyp jatyrmyz", - deidi oblystyq kásipkerlik basqarmasynyń bólim basshysy Murat Málikajdar.
Biyl Abai oblysynda 20 shaqty turǵyn 5 mln teńge kóleminde qaitarymsyz qarjy alady. Bul maqsatqa 110 mln teńge bólý josparlanyp otyr.
