Qazaqstandyq shahmatshy Bibisara Asaýbaeva 2025 jylǵy blits shahmattan álem chempionatynda jeńiske jetti, dep habarlaidy Dalanews.kz.
Aita keteiik, blits - jyldam shahmattyń bir túri.
Finalda qazaqstandyq sportshy ýkrainalyq Anna Mýzychýkty tórtinshi, sheshýshi partiiada jeńdi. Buǵan deiingi úsh partiia teń nátijemen aiaqtalǵan.
Týrnir Qatar astanasy Doha qalasynda ótti. Asaýbaeva aldymen shveitsariialyq júie boiynsha ótken kezeńde 15 týrdyń qorytyndysy boiynsha birinshi oryn alyp, jartylai finalǵa joldama aldy.
Jartylai finalda ol qytailyq Chjý Tszinerge qarsy oiynda tolyq basymdyq tanytyp, úsh partiiany qatarynan jeńip shyqty.
Finalda Bibisara Asaýbaeva Ýkraina ókili Anna Mýzychýkpen kezdesti. Alǵashqy úsh partiia teń aiaqtalyp, tórtinshi, sońǵy partiiada qazaqstandyq shahmatshy qarsylasyn tize búktirip, chempion atandy.
Osylaisha Bibisara Asaýbaeva blits shahmattan úsh dúrkin álem chempiony atanǵan Qazaqstan tarihyndaǵy alǵashqy shahmatshy boldy. Buǵan deiin ol 2021 jáne 2022 jyldary da álem chempionatynda top jarǵan.
Memleket basshysy Qasym-Jomart Toqaev Bibisara Asaýbaevany shahmattyń blits túrinen álem chempionatyndaǵy jeńisimen quttyqtady.
"Bibisara Asaýbaeva Qazaqstannan shyqqan blitsten úsh dúrkin álem chempiony jáne maitalman sheber retinde dúniejúzilik shahmat tarihyna endi. Qazaqstandyq shahmat qaýymdastyǵy memleketimizdiń kók týyn jahandyq arenada biik jelbiretken otandasymyzdyń jeńisin maqtan tutady.
Bibisara Asaýbaevanyń halyqaralyq jarystardaǵy aitýly jetistikteri men el shahmatyn damytýǵa qosqan eleýli úlesi úshin ony II dárejeli «Barys» ordenimen marapattaý týraly sheshim qabyldadym, – delingen quttyqtaýda.
