Eske sala ketsek, ótken aptada Qazaqstan Reseidi Ýkrainadaǵy soǵysyn toqtatýǵa shaqyratyn BUU rezoliýtsiiasyna qarsy daýys bergen edi. Rezoliýtsiianyń ózi «ýaqytsha basyp alynǵan Qyrym avtonomdy respýblikasy men Sevastopol qalasyndaǵy (Ýkraina) adam quqyǵy ahýaly» dep atalady. 15 jeltoqsanda BUU Bas assambleiasy qabyldaǵan qujatqa 82 el qoldap daýys bergen, 14 el qarsy shyqqan, 80 memleket qalys qalǵan.
Búgin Qazaqstannyń osy qadamy týraly jýrnalister Májilis kýlýarynda depýtat Aidos Sarymǵa suraq qoidy. «Bul sheshim Qazaqstan halqy múddesi turǵysynan qabyldanǵan sheshim dep oilaisyz ba?» degen suraqqa «árine» dep jaýap berdi.
«Mynany túsineiik. Qazaqstan Qyrymdy, Donbasty moiyndamaimyn dep, úzildi-kesildi aitty. Qazir Ýkraina men Resei arasynda keskilesken soǵys júrip jatyr. Ár tarap óz múmkindigin arttyrý úshin Birikken Ulttar uiymynyń minberin paidalanady. Zańdy nárse.
Bizdiń másele – óz jaǵdaiymyzdy eskerý. Kóptegen jaǵdaida Qazaqstan qalys qalyp otyrady. Sol siiaqty diplomatiialyq yrym-joralǵylardy jasaýǵa májbúrmiz. Osy jaǵyn da qazaqstandyqtardy durys túsinýge shaqyramyn», – dedi depýtat.
Al «munyń saldary Qazaqstan úshin aýyr bolyp ketpei me?» degen suraqqa «aýyr bolmaidy» dep jaýap berdi.
«Bul joly qarsy bolsa, kelesi joly qarsy bolady. Amal joq, sóitemiz. Qazaqstannyń jaǵdaiyn eskerseńizshi. Siz mysaly úshin úlken bir úide turyp jatyrsyz deiik. Bir kórshińiz alqash, bir kórshińiz nashaqor, basqa deiik. Qalai bolsa da siz olardyń jaǵdaiyn eskerýińiz kerek qoi. Nemese kúshimiz jetse solarmen kúresýimiz kerek.
Bizdiń jaǵdaida Qazaqstan qazir Reseidiń kóńilin, jaǵdaiyn, ondaǵy qoǵamdyq pikirdi, basqany eskerip otyrýy tiis.
Bul soǵys bizge kelgenin qalaisyz ba? Qalamaimyz. Sondyqtan, osyndai tirlik jasaýǵa májbúrmiz» – dep suraqqa suraqpen jaýap berdi depýtat.
Aidos Sarym BUU-daǵy Qazaqstannyń osy jolǵy qadamyn «soǵysty qoldaý» dep sanamaitynyn aitty.
«Qazaqstan ol soǵys jaily birneshe ret málimdeme jasaǵan. BUU qabyldaǵan barlyq iri sheshimderdiń astynda Qazaqstannyń qoly bar. Diplomatiialyq jolmen másele sheshilýi kerektigin kún saiyn aityp jatyrmyz. Bizdiń qolymyzdan keletini ázirge osy.
Qazir Toqaevtyń ornyna kim kelse de, bir aptadan keiin dál osy saiasatty ustanýǵa májbúr bolady.
Bul bizdiń oilap tapqan nárse emes. Ókinishke qarai, bul oiynda bizdiń upaiymyz asa keremet emes. Sondyqtan, kórpemizge qarai kósilip, Qazaqstannyń ishki jáne syrtqy jaǵdaiyn eskeremiz.
Qazir endi Qazaqstanǵa 5-10 jyldyq tynyshtyq kerek. Sol tynyshtyqty paidalanyp, Qazaqstan óziniń reformalaryn eselep júrgizip, qorǵanys salasyn kúsheitýi kerek. Basqa da kezek kúttirmeitin sharýalar bar. Sony oryndaý úshin keide ózimizge unamaityn sheshimderdi qabyldaýǵa májbúr bolamyz», – dep túidi Aidos Sarym.
https://dalainside.kz/12/manyzdy/19/2022/796
