Ánshi Qaraqat Ábildina «1001 tún» baǵdarlamasynda ápkesi, aqyn Qymbat Ábildáqyzy týraly aityp, onyń ómiri men shyǵarmashylyǵyna úlken yqpal etkenin jetkizdi.
Óner iesiniń sózinshe, ápkesi bala kezinen oǵan qatal bolǵan. Sol kezde bul minezin qabyldaý qiyn bolǵanymen, búginde onyń tárbiesine alǵys aitady.
«Qymbat apaiym qatal boldy. Buryn bul qataldyǵyn unatpaitynmyn, tipti jek kóretin edim. Biraq qazir bárine alǵys aitamyn. Apaiymnyń tárbiesiniń arqasynda meniń qundylyqtarym men ustanymdarym qalyptasty», – dedi Qaraqat Ábildina.
Ánshi ápkesiniń ónerdegi alǵashqy qadamdaryna da qoldaý kórsetkenin atap ótti. Onyń aitýynsha, Qymbat Ábildáqyzy sol kezeńde prodiýser retinde baǵyt-baǵdar berip, suhbatqa shyǵýyna, án aitýyna jáne sahnada ózin kórsetýine múmkindik jasaǵan.
«Árdaiym demep, qoldap otyrǵanyn eshqashan umytpaimyn», – dedi ánshi.
Aita keteiik, Qaraqat Ábildina men ánshi ári prodiýser Qydyráli Bolmanov bes bala tárbielep otyr. Juldyzdy jup ónerde de birge eńbek etip keledi.
