Almaty qalasynyń №2 Medeý aýdandyq soty eks-sýdia Svetlana Jolmanovaǵa úkim shyǵardy. Ol ortasha qaýipsizdik mekemesinde 10 jyl bas bostandyǵynan aiyrý jazasyn óteitin boldy, dep habarlaidy Dalanews.kz.
Alaiaqtyq isi
Tergeý materialdaryna súiensek, Svetlana Jolmanova azamattardy jyljymaityn múlik satyp alýǵa jáne jalǵan tenderlerge qatystyrýǵa ýáde berip, olardy aldap kelgen. Osylaisha, ol 1 milliard teńgege jýyq qarjyny iemdengen.
Onymen birge aiyptalýshylar qatarynda Daniiar Qushaliev te bar. Tergeý olardyń bul áreketti aldyn ala kelisip, birlesip jasaǵanyn aitady. Is boiynsha 48 epizod qaralǵan, ondaǵan jábirlenýshi sotqa aryzdanǵan. Jolmanova jábirlenýshilerge óziniń sýdialyq tájiribesi men bedelin alǵa tartyp, aqsha berýge sendirgen.
Istiń hronologiiasy
2021 jylǵy 28 sáýirde sol kezdegi Medeý aýdandyq sotynyń sýdiasy Svetlana Jolmanova alaiaqtyq jasady degen kúdikpen tergeýge alynǵan bolatyn. Onyń qyzmettik kabinetinde júrgizilgen tintý barysynda 10 myń dollar tárkilengen. Ol bul aqshany ipoteka rásimdeýge jinaǵanyn aitqan.
2022 jyly Jolmanova qylmystyq istiń toqtatylǵanyn alǵa tartyp, qyzmetine qaita oralýǵa áreket jasaǵan. Alaida 2023 jylǵy 12 mamyrda ol resmi túrde sýdia laýazymynan bosatyldy. Endi bul is qaita qozǵalyp, naqty úkim shyqty.
