Saiasattanýshy Marat Shibutov jańa Konstitýtsiia týraly áleýmettik jelilerde taraǵan qaýesetti, joramaldar men jalǵan aqparatty jariia túrde joqqa shyǵardy. Sondai-aq, ol Konstitýtsiialyq komissiianyń kezekti otyrysynda Prezident pen Quryltai arasyndaǵy kadrlyq ókilettikterdiń bólinisi jóninde de pikir bildirdi, dep habarlaidy Dalanews.kz.
Komissiia múshesi otyrystar arasyndaǵy úziliste áleýmettik jelide Qazaqstannyń jańa Konstitýtsiiasy jobasy týraly shyndyqqa janaspaityn aqparat men baryp turǵan feikterdiń kóptigin baiqaǵan.
«Keibir azamattar Komissiianyń jumysy týraly sol Komissiianyń otyrystaryna qatysyp júrgen menen de kóbirek «biletindei» kórinedi», – deidi saiasattanýshy.
Onyń aitýynsha, kez kelgen adam oqyp, tanysýy úshin qujat kópshiliktiń nazaryna usynylyp, ashyq túrde jariialanǵannan keiin de aqparatty ádeii burmalaý toqtamaǵan.
«Meniń oiymsha, bul endi oiyn emes, tanymal bolýǵa umtylys ta emes, naǵyz qasaqana piǵyl», – dep atap ótti Marat Shibutov.
Spiker «jańa Konstitýtsiia jobasy saiasi monopoliiaǵa ákep soǵady» degen jańsaq pikirdi joqqa shyǵardy. Sebebi qujatta mundai múmkindikke jol bermeitin jańa ókildi institýt – Halyq Keńesin qurý kózdelgen.
Saiasattanýshy bul máseleni de naqty tarqatyp berdi. Qazir Qazaqstan Respýblikasynyń Senaty 40 máslihat ókilinen, Prezident kvotasy boiynsha 5 adamnan jáne Qazaqstan halqy Assambleiasynyń 5 ókilinen quralǵan.
Al Halyq Keńesine máslihat ókilderinen bólek, qoǵamdyq keńesterdiń músheleri de engiziledi, QHA ókilderiniń sany 5-ten 42-ge kóbeitilip, qoǵamdyq uiymdardan – 42 adam qosylady. Osylaisha, jańa saiasi institýttaǵy azamattyq ókildik Qazaqstan tarihyndaǵy eń aýqymdy deńgeige jetkizilmek.
«Halyq Keńesi kóptegen adamdar úshin saiasatqa kelý shegin aitarlyqtai tómendetedi, buryn-sońdy mundai múmkindik bolmaǵan. Bul óte mańyzdy», – dedi Marat Shibutov.
Sonymen birge, ol Komissiianyń «jabyqtyǵy» men «durys emes quramy» jónindegi aiyptaýlarǵa da jaýap berdi.
«Tikelei efirlerdi eskersek – birinshi aiyptaý kúlkini keltiredi. Munda bizdi barlyq taraptan kameralar túsirip tur», – dep atap ótti saiasattanýshy.
Sondai-aq, spiker Komissiia quramyndaǵy 130 adamnyń 44-i – qoǵamdyq uiymdar, qoǵamdyq keńester, BAQ, bilim salasy jáne ǵylymi uiymdardyń ókilderinen quralǵanyn jetkizdi.
«Menińshe, munda pikirlerdiń barlyǵy eskerilgen», – dedi Marat Shibutov.
Baiandamasynyń negizgi taqyrybyna kóshe otyryp, saiasattanýshy Prezident pen Quryltai arasyndaǵy kadrlyq ókilettikterdi bólý máselesine de toqtaldy.
Onyń aitýynsha, jańa Konstitýtsiia jobasyna sáikes, Quryltai mynadai tulǵalardy taǵaiyndaýǵa nemese kelisimin berýge quqyly: Premer-Ministr, Vitse-prezident, Konstitýtsiialyq sottyń 10 sýdiasy, Ortalyq sailaý komissiiasynyń 6 múshesi, Joǵarǵy aýditorlyq palatanyń 8 múshesi jáne Joǵarǵy sottyń barlyq sýdialary.
Osylaisha Prezident Ortalyq sailaý komissiiasynyń 2 múshesin, Joǵarǵy aýditorlyq palatanyń 2 múshesin jáne Konstitýtsiialyq sottyń 4 sýdiasyn endi taǵaiyndamaityn bolady.
Sonymen birge, Memleket basshysynyń konstitýtsiialyq organdardyń jetekshilerin – Konstitýtsiialyq sottyń, Joǵarǵy sottyń, Ortalyq sailaý komissiiasynyń jáne Joǵarǵy aýditorlyq palatanyń tóraǵalaryn, Adam quqyqtary jónindegi ýákildi, sondai-aq oǵan baǵynyshty nemese esep beretin organdardyń basshylaryn taǵaiyndaý quqyǵy saqtalady.
«Mundai júie Prezident pen Quryltai arasyndaǵy saiasi institýttar retindegi tepe-teńdikti saqtaýǵa múmkindik beredi», – dep atap ótti Marat Shibutov.
