Qazaqstanda balalarǵa qatysty zorlyq, qatygezdik jáne býlling faktilerine áreket etýdiń biryńǵai vedomstvoaralyq algoritmi bekitildi, dep habarlaidy Dala News.
Qujat «Quqyq buzýshylyqtardyń aldyn alý týraly» zań aiasynda qabyldanyp, alǵash ret barlyq jaýapty organdardyń mindetterin naqty bólip berdi. Endi politsiia, bilim berý uiymdary, meditsina qyzmetkerleri jáne qamqorshylyq organdary bir júie boiynsha áreket etedi.
Jańa algoritmge sáikes, bala quqyǵy buzylǵany týraly kez kelgen aqparat naqty merzimdermen iske qosylatyn mindetti áreketter tizbegin bastaidy.
Negizgi jańalyqtyń biri keis menedjerler institýtynyń engizilýi boldy. Árbir jaǵdai boiynsha naqty bir maman bekitiledi. Ol barlyq qyzmetterdiń jumysyn úilestirip, balanyń quqyqtary tolyq qalpyna kelgenge deiin súiemeldeidi. Bul jaýapkershiliktiń ár organ arasynda joǵalyp ketýine jol bermeidi.
Erejede áreket etý merzimderi de alǵash ret naqty bekitilgen. Zorlyq faktisi týraly aqparat birden barlyq ýákiletti organdarǵa beriledi. Bir saǵat ishinde bala quqyqtaryn qorǵaý organyna joldanady. Bir jumys kúni ishinde keis menedjer taǵaiyndalyp, balanyń turmys jaǵdaiy tekseriledi. Úsh jumys kúni ishinde materialdar kámeletke tolmaǵandar isi jónindegi komissiiaǵa jiberilýi tiis.
Endi tek resmi aryz ǵana emes, balalardyń ózinen túsken signaldar, 111 bailanys ortalyǵy, áleýmettik jeliler men buqaralyq aqparat quraldaryndaǵy málimetter de negiz bolady. Bul iske mobildi toptar men psihologiialyq qoldaý ortalyqtary da tartylǵan.
Balalarǵa kórsetiletin kómek biryńǵai standart boiynsha júzege asady. Ol meditsinalyq, psihologiialyq, pedagogikalyq, áleýmettik jáne quqyqtyq qoldaýdy qamtidy.
Mańyzdy ózgeristiń biri endi tek zorlyq kórgen balalar ǵana emes, sondai jaǵdaidyń kýási bolǵan balalar da memlekettik qorǵaýǵa alynyp, mindetti túrde súiemeldeýge jatqyzylatyn boldy.
